Apia, 31 Me 2021 – Tausisia faiga fa’atemokarasi ma aia tatau.
Ua savalia nei e Samoa mo le ulua’i taimi se tulaga ese i lona talafa’asolopito fa’aupufai o malo.
Sa mata’ituina ma le toto’a e le Ofisa o le Komesina o Sulufaiga o le Ofisa tutotonu foi lea mo aia tatau faaletagata soifua, le fa’agasologa o la’asaga uma sa fa’afoe ai galuega talu le maea ai o le faiga palota a le atunuu. Ma e talitonu o lo’o gasolo lelei le fa’atinoga ma le amanaia o aia tatau ma saolotoga faale tagata soifua, e pei ona faamaonia e le Faavae.
E ui lava i le eseese o vaega faaupufai e lagolagoina e tagata o Samoa, ae o lo’o mafai lava ona faatino lo latou saolotoga e auai ai, saolotoga e faapotopoto ai, ma le saolotoga e faaleo ai o latou lagona e aunoa ma se faalavelaveina, poo se tulaga saisaitia ai poo le saisai faaletulafono.
E matou te avatu le fa’amalo I le Matagaluega o Leoleo ma le latou auaunaga faifai pea i le tausisia lea o le saogalemu o tagata uma, tainane o auaunaga moomia lautele mo galuega fa’atino ao feagai ai ma taimi o le le mautonu faapenei.
E momoli atu foi le Faafetai i tagata nuu uma o Samoa mo le galulue felagolagomai i le tausisia ole filemu.
Ao taumafai ai ta’ita’i o vaega faaupufai o malo, ta’ita’i o Ekalesiaatoa ma ta’ita’i faale aganuu e tau fofo alamea le mataupu, ina ia tumau pea Samoa i lona saogalemu, ma le faiga tutusa ma fa’amaoni. Ua tu’u atu fo’i le tauau ole Ofisa e tutu fa’atasi ma le atunuu ina ia atili faatumauina ai pea tulaga moomia mo pulega lelei, i le puipuiga ma le faalauiloaina o aia tatau faale tagata soifua e pei ona faamauina faaletulafono.
O tulaga moomia ma le ‘oa i pulega faatemokarasi na pulea mai ai lenei atunuu talu ona tutoatasi a’o folau pea le sa o si o tatou atunuu, o se temokarasi talavou. O le fa’aaloalogia o faiga faatemokarasi, pule a le tulafono, o aia tatau faale tagata soifua, ma le tausisia o pulega lelei, ua fusia i tu ma aganuu aemaise o talitonuga faakerisiano, ua avea ai i tatou ma fa’ataitaiga lelei i totonu ole Pasefika ma fafo atu. O nei tulaga moomia uma ole faitoto’a lea i a tatou taumafaiga mo se vaifofo. E talitonu o le a mafai ona ausia se fofo.
O le agaga faaaloalo ma le faatauanau, ina ia faatumauina pea ona faataua ma taofi mau nei tulaga moomia aua o le malu lea ole tausiga o le va nonofo ai o le tafatolu faatauagai o lala ole Malo – ole Pule Faatonu, ole Fono Aoao Faitulafono, ma le Faamasinoga, ma a latou matafaioi tumaoti.
O le tutoatasi ole Faamasinoga o le fatu lea o le pule a le tulafono e ao ina tausisia.
Matou te fa’amalosiau atu i Ofisa mataeseese uma, ia faamalosia le faaauau ma taimua e leoleoina nei talitonuga taua fa’atemokarasi. Ma fa’amanatu atu ai fo’i lo tatou tiute fai fa’atasi o le faaaloalogia o mamalu o tagata soifua.
Ao fou mai le faamanatuina ole aso o lo tatou Tutoatasi e ofo alofa atu ai mo tagata uma o Samoa se tutoatasi filemu.
*END*
