SAUNOAGA A LE AFIOGA I LE PALEMIA, FIAME NAOMI MATAAFA E FA’AILOA AI NISI O MATĀ’UPU UA FA’AI’UGAFONOINA E LE KAPENETA I LANA FONOTAGA
Aso Lulu, 01 o Setema 2021;
(OFISA SO’OUPU); E faatalofa atu Samoa i ou tulaga faalupe mai le tatou faasalalauga masani i vaiaso taitasi i le maea mai ai o le fonotaga a le tatou Kapeneta. Faamalo le tauata’i i le tatou atunuu, faamalo le lagi e mama ma le soifua manuia ma faafetai i le alofa o le Atua ua taitaina mai lo outou soifua ma lo tatou ola. Ia aoina pea le masina ma faamanuiaina pea le tatou atunuu i le alofa ma le agalelei o le Atua.
TALA O LE TUPE AUTU 2021-2022
O le galuega tele sa feagai ma le Kapeneta aemaise le tapena mai o le afioga i le tamaitai Minisita o Tupe ma le Matagaluega o Tupe, mo le tapenaina lea tala o le tupe autu mo le tausaga 2021 i le 2022 o lea o loo iai le faamoemoe e faataatia i luga o le laulauāfono i le masina fou. O le aso ananafi sa faapea ona aumai ai le ata o le tala o le tupe e silasila agai iai le Kapeneta.
I le maea ai o le feiloā’iga muamua ma le Afioga i le tamaitai Minisita ma lana Matagaluega ma le laulauāfono a le Kapeneta, ona faapena lea ona valaauina foi le vasega o faauluuluga o Matagaluega ma Pulega eseese a le Malo e faapena ona fofogaina le tala o le tupe aemaise tulaga o le faasoa mo vaega eseese o le atunuu.
TAUAOFIAINA LE FONO FAITULAFONO I LE ASO 14 SETEMA 2021
O le faamoemoe la, ua maea foi ona fesootai ma le Afioga i le Fofoga Fetalai, e fuafuaina lea o le polokalame mo le fono faitulafono aemaise le mataupu lenei o le tala o le tupe ma o lea ua avea ai le logo i sui Faipule o loo iai le faamoemoe e tauaofia le tatou fono faitulafono i le aso 14 Setema.
O loo talitalia foi poo iai se tapenaga a le Afioga i le Minisita ma le Komesina o Faiga -Palota ona o lea e silafia e le tatou atunuu ua iai faaiuga a le faamasinoga ua faia e tusa ai ma nisi o moliaga o soligā tulafono o faiga palota ma o lea ua iai nisi o Itumalo ua faalēaogaina tofiga ona o faaiuga a le faamasinoga ma e ao ona tapena le Komesina o Faiga-Palota mo a tatou palota laiti. I le tulaga la ae le’i fa’atulagaina aso o faiga palota laiti, e ao ona tapena mai le Matagaluega ini teuteuga o le tulafono o faiga palota e ao ona fai e faaaogaina ai le tauaofiaga o le fono lea laa amata i le aso 14 o Setema.
O loo silafia lelei ele atunuu, o le tatou tala o le tupe, e faatoa lauiloa aloaia i le taimi e faapena ona faataatia ai le tulafono o le tala-faatatau o le tupe i luga o le laulauāfono a le Palemene lea o loo fuafuaina mo le aso 14 Setema.
TUSI ALOAIA MAI LE AUFAIGALUEGA A LE MALO (P.S.A) MO LE AFIOGA I LE PALEMIA
O le lona lua o mataupu e fia fai iai se faamatalaga puupuu, ua lausilafia foi e le tatou atunuu se tusi na faalauiloa e faapea o se tusi na tapenaina e se vaega o le aufaigaluega a le Malo. O lena tusi, o lea ua taunuu mai i lou ofisa ma ua iai se talosaga o loo aumai faatasi ma lena tusi o lea ua leva ona faasalalau e fia feiloai main i sui, poo le aufaigaluega a le Malo. Ona o lea faatoa tau mai le tusi i lou ofisa, o loo ou fia faitau lelei iai ma malamalama foi i le auga ma le faamoemoe, ona fai lea o le tali talafeagai mo lea faamoemoe.
O le tulaga lava ia i le maitau atu i le tusi, o popolega o loo iai i le aufaigaluega ona o le vaea o nisi o le aufaigaluega, aemaise ē o loo mautofi. Atonu o loo manino le tatou atunuu i le pale mai o le faigamalo fou, o i latou o loo faapena ona faagasolo iai fuafuaga a le Malo, o lea faatoa mavae atu i le vaiaso ua tuanai le ofisa sili ole Pulega o le Matagaluega o Tupe ma ua maea lena mataupu i le maliega i le va o le Afioga i le tamaitai Minisita ma le sa tulai mai i le tofi o le faauluuluga o le Matagaluega o Tupe. I tua atu o lena vaiaso sa faapea ona faalauiloa atu le faamamoemoe ua iai i le Malo, o le tuuina atu lea o se faamatalaga i le tamaitai Loia Sili, ona ua tupu se manatu i ate au ma le Kapeneta, ona o mea ua tutupu, ua le mafai ona faaauau ona matou galulue faatasi i luga o le tulaga lea o le faatuatua ma fefaatalitonua’i (confidence) ona o mea ua tutupu. Sa faapea foi ona tulai mai se tulaga faapena i le Fofoga Fetalai ma le sa tula’I mai o le Failautusi o le Fono. O lona uiga la e tolu tofiga ia ma o loo iai mafuaaga tatau ma o loo faagasolo i luga o aiaiga faaletulafono ma tulaga masani i le va o le Malo poo le ōu galuega ma i latou o loo faapena ona umia tofi i lalo o aiaiga foi o na tofiga.
E iai nisi ua faamavae, faapei foi ona iai le susuga ia Aiono, o le sa taitaifono i le Komisi o le na pulea le aufaigaluega a le Malo. O le susuga ia Aiono sa faalia lava lona faamoemoe i le faigamalo taluai, a maea loa le piliota o lana konokarate sa tauave mai i le tolu tausaga, o lea faapena ona malolo mai ia. Sa talosagaina e le faigamalo taluai le susuga ia Aiono ina ia onosai ma faaauau sei tulai mai le faigamalo pea maea atu tatou faiga palota ona faaauau lea o lona faamoemoe. Ma o le tulaga lena na tupu ua maua mai le faaiuga o le tatou faiga palota, ua tulai mai le faigamalo fou, ma faapena ona susu mai le susuga ia Aiono ma faaoo mai lana faamavaega e tusa ma lona faamoemoe sa iai e faamaea lelei le piliota o lana konokarate sa auauna ai.
O le faamavaega lona lua, o le susuga i le Komisina o Leoleo, ma o lena foi sa fofoga le tatou atunuu i se faasalalauga a le susuga i le Komesina, o le aso lava sa tauaaoina ai lana Minisita le tusi faamavae o le aso foi lena e amata ai le tuua o le galuega.
O tulaga masani lava ia o faiga o galuega i le tulaga o le faamavae, i le tulaga o le vaea ona o ni tulaga tatau. I le taunuu mai la o le tusi lea sa muai faasalalau i se tulaga faalauaitele i luga o upega tafa’ilagi ma isi foi auala faasalalau, ma ona o lea faatoa taunuu aloaia mai i lou ofisa, o lea faapena foi ona Iloilo iai ma fai le tali e talafeagai ai foi i mataupu o loo lagaina mai ai ma momoli atu foi i se auala e faalauaitele atu foi mo le silafia o le tatou atunuu.
O nai faasalalauga pupuu lena o lenei vaiaso, e molimoli atu moomooga alofa mo le atunuu ma le tatalo lava o lea faapena ona faaauauina pea le tausiga alofa a le Atua mo i tatou uma i le tatou faigamalaga o loo faagasolo i lenei tausaga.
Soifua ma ia manuia.
