Saunoaina: Afioga i le Tamaitai Palemia, Hon. Fiame Naomi Mataafa
Aso: 10 Tesema, 2021 @ 9:00 am
Lau susuga i le Taitai o le Sauniga
Afifio Minisita o le Kapeneta
Sui a Faipule o le Palemene a Samoa
Le paia o Malo faaaloalogia
Sui o Malo ma Paaga mai Fafo
Tainane Samoa ua potopoto
O ou paia, o sa ma faiga mai le Matafanua seia paia Siuofanua, oute talitonu o lea lava ua poto i Matagalialalua nei. Le Atua e, ia viia oe, aua o lou alofa ua matou feofoofota’i ai i lenei afiafi o matagofie.
Lau Susuga i le Taitai o le Sauniga, faafetai mo le upu o le poto, faafetai mo le feau faalaeiau auā Samoa lea e faafogafoga tapuai mai. Ia alofagia e le Atua faatumu ou fale saito o meaalofa faale-agaga auā lana Talalelei.
O le asō, ua faai’u iai galuega sa faatino mo le 16 ASO, na amata mai le aso 25 o Novema, ina ia tineia ma aveesea lenei faafitauli ua luitauina ai pea lo tatou atunuu. Ua oia ai o tatou aiga, ua aafia ai Ekalesia, lofia ai nuu ma le atunuu.
O lenei polokalame faava-o-malo, e faamanatu i tausaga uma, o se valaau i tagata uma ina ia tutu faatasi e tali atu ma faailoa le tete’e i faiga faailoga lanu, faailoga tagata ma sauaga faasaga i tinā ma tamaitai uma o le lalolagi.
O se vaitau foi e unaia ai pea le amanaia o aia tatau faatagata soifua a tagata uma aemaise i latou e maaleale le soifua. O totonu o lenei vaitau e aofia ai ma le faamanatuina o le Aso Faava-o-Malo mo le amanaia o aia tatau a i latou e iai aafiaga tumau o le soifua, e faailoga i le aso 03 o Tesema. Ae ona o le telē o le faamamafa a lo tatou Malo iā i latou e iai aafiaga tumau, ua lē faailogaina ai i le na’o le aso e tasi le aso ae ua vaiaso atoa, e pei ona faailogaina i lenei foi tausaga mai i le aso 29 o Novema agai i le aso 03 o Tesema. E lē gata i lea, ae o le vaitau foi lenei e aofia ai ma le aso faava-o-malo mo aia tatau faatagata soifua uma (International Human Rights Day) lea e faamanatuina foi i le asō, aso 10 o Tesema.
I le silasila a le Malo “E taua tagata uma”
O galuega faatino sa faagasolo i totonu o lenei 16 aso e aofia ai polokalame eseese sa faatautaia e faalapotopotoga tumaoti ma Matagaluega ma Ofisa eseese o le Malo, o nuu foi ma afioaga aemaise o Ekalesia; ma o se tulaga lea e lagona ai le agaga faafetai, i le molimauina o le taufai tulai mai o faalapotopotoga eseese e opogi le feau ina ia nofo filemu ma saogalemu o tatou tagata aemaise i latou e maaleale le soifua e aofia ai tinā ma tamaitai, ma fanau faapea foi i latou e iai aafiaga tumau.
Mo le Matagaluega o Tina ma Tamaitai, Atinae o Afioaga ma Agafesootai, o nisi o galuega faatino sa mafai ona faataunuu i totonu o lenei vaitau i lenei tausaga e aofia ai:
1. Le Polokalame faalauiloa i luga o televise, leitio ma upega tafailagi;
2. O Polokalame faale aoaoga mo paaga galulue faatatau i le taiala o auaunaga e tali atu i sauaga faasaga i tinā ma tamaitai ma le puipuiga o fanau, o lenei galuega faatino sa galulue soosootauau ai le Matagaluega ma le UN Women;
3. O le Polokalame faalauiloa o le taiala o auaunaga mo le tali atu i sauaga faasaga i tinā ma tamaitai ma le puipuiga o fanau, mo sui o nuu ma sui tamaitai o nuu i Upolu ma Savaii, sa fesoasoani iai le UNFPA;
4. O le Polokalame faale-aoaoga mo le puleaina o le taumafaina o le ava malosi ma le taofia o fualaau faasaina i Upolu ma Savaii – o lenei polokalame sa galulue faatasi ai le Matagaluega ma le Malo o Peretania faapea ma faalapotopotoga a le Salvation Army ma le Teen Challenge i lona faatinoina;
5. O le Faasoa i le fausiaina o feau talafeagai mo le puipuiga o fanau ma sauaga i totonu o aiga, i Upolu ma Savaii – o lenei polokalame na galulue faatasi ai le Matagaluega ma le UNICEF faapea le faalapotopotoga o le toomaga mo e puapuagatia (SVSG) i lona faatinoina faatasi ai ma nai kamupani mo le tuufaatasia o feau faalauiloa e aofia ai le Makeki online ma le Sleeping Giants;
6. O le Polokalame faale aoaoga faatatau i sauaga faasaga i tinā ma tamaitai sa faatinoina mo tama ma teine taaalo i le faalapotopotoga a le Lakapi Samoa;
7. O le Polokalame faalauiloa i sui o afioaga e uiga i auaunaga eseese mo i latou e iai aafiaga tumau o le soifua – o lea polokalame i lona faatinoina na galulue soosootauau ai le Matagaluega ma le Malo o Ausetalia, faapea le Nuanua o le Alofa, Senese, Loto Taumafai, Aoga Fiamalamalama, Samoa Spinal Network, o le Matagaluega ole Soifua Maloloina e tauala mai i le ENT (Ear Nose and Throat) ma le MDS (Mobility Devices Services), Special Olympics Samoa, SASLI (faalapotopotoga a le au faaliliu i le gagana faataga), SBPA (Samoa Blind Persons Association, DAS (Deaf Association of Samoa), faapea ma le Goshen Trust
8. O le Fonotaga foi ma paaga galulue mo le tuufaatasia ma le faamaonia o le ripoti a Samoa i le gasologa o ana galuega faatino i lalo o le feagaiga faava-o-malo mo le amanaia o aia tatau a i latou e iai aafiaga tumau o le soifua- sa galulue iai le Matagaluega ma ana paaga uma i le polokalame o le Samoa Disability Partnership Program o loo lagolago mai iai le Malo o Ausetalia
9. O le faataamiloina o le Sulu o le Faamoemoe Ola (Torch of Hope) ia Savaii, Manono ma Upolu – o lenei faamoemoe sa galulue faatasi ai le Matagaluega ma le Matagaluega o Leoleo, Matagaluega o Faamasinoga, o le polokalame a le Malo Aufaatasi mo le tafi esea o sauaga le Spotlight Initiative, o le Iuni Lakapi a Samoa faapea le mamalu o afioaga eseese sa taupati ane e opogi le faamoemoe. E le gata i lea ae o vaega eseese sa afea e le sulu, e aofia ai le taamilosaga netipolo o le Super 4 Netball, o le polokalame o le REACH o loo faatinoina e le Matagaluega o Faamasinoga i afioaga eseese, o le polokalame o le Aso Faava-o-Malo mo Puipuiga o le HIV Aids sa faatinoina e le Matagaluega o Soifua Maloloina ma le tele o isi faamoemoe sa afea e le sulu.
10. O le Polokalame o le tatala ma le tapunia aloaia o le 16 aso e pei ona iai le aso 25 o Novema ma lenei asō, le aso 10 o Tesema, o loo fesoasoani tele mai iai le faalapotopotoga a le UNFPA.
E faaoga ai lenei avanoa e momoli ai le faamalo i paaga galulue uma sa gapatia i galuega faatino o le 16 Aso e tetee atu i sauaga faasaga i tina ma tamaitai, i lenei tausaga. Malo le galulue, malo le faatoatoa, faafetai le silasila alofa i tina ma tamaitai faapea fanau a Samoa.
E faapitoa ai le faafetai i paaga na fesoasoani mai i le faatupeina o taumafaiga eseese o lenei polokalame – le polokalame a Malo Aufaatasi mo le tetee atu i sauaga, le Spotlight Initiative, o le UNFPA, UNICEF, ma le UNWomen. E gata i lea e faafetaia foi le Malo o Ausetalia tauala mai i le poloketi o le Samoa Disability Partnership Program mo le sao taua i le faamanatuina o le 16 Aso o lenei tausaga. Faafetai foi i le Malo o Peretania mo le fesoasoani i le faatupeina o le polokalame mo le pulea o le ita, pulea o le taumafaina o le ava malosi ma le taofia o fualaau faasaina.
O le avea ai o Samoa ma sui auai o le feagaiga fa ava o malo e tetee atu ma tafiesea faiga faailoga tagata ma faailoga lanu faasaga i tina ma tamaitai, o le pine lea o le leai atu o lo tatou atunuu i nei faiga faapaupau ma le inosia. O le faailoga o le talisapaia e lo tatou atunuu o le amanaia o aia tatau ma le lagonaina o siufofoga o i latou e maaleale le soifua, aua o le upu moni, e fou mai nei feagaiga ae ua leva lava ona iai a tatou tu, aganuu ma agaifanua e amanaia ai tamaitai. E le o se tatou aganuu le faia o sauaga, ma e le ogatasi ma talitonuga faa kerisiano o loo faavae ai Samoa.
E avea ai lenei itula ou te fiafia e faapea atu ai, ua tapunia aloaia nei galuega faatino mo le 16 Aso e Tetee atu i Sauaga Faasaga i Tinā ma Tamaitai, 2021.
Soifua ma ia manuia.
