PEPA O FAAMATALAGA
E tusa ai ma le vaega 36 o le Tulafono 1972 a le Faaputugatupe mo le Lumanai Manuia o Tagata, ua faamaonia nei e le Komiti Faatonu ma le Pulega le tului e 8.0% mo le tausaga faale-tupe faaiuina i le aso 30 Iuni 2021 i lona tau aofai e $60 miliona tala.
O loo mataitu lelei e le Faalapotopotoga le tulaga pagatia o loo iai pea le lalolagi ona o le faamai o le Koviti-19. Ma o lo o mautinoa foi le aafia ai o le faasoa tau tupe a le tele o aiga o si o tatou atunuu ma le au faisaofaga ona o le aafia o Samoa i le tulaga faaletonu o le tamaoaiga o le lalolagi.
O le mafuaaga tonu lea ua ae ai le tofa i le Pulega ma le Komiti Faatonu e alagatatau ona faaauau pea le totogi tupe o se vaega o le tului faamealofa mo le au faisaofaga i lenei tausaga.
O le faamatuuina o lenei meaalofa e fuafuaina e faapea:
- $30 miliona (4.0%) o le a totogi tupe i le Aso 1 Iulai 2021 (e faamaeaina ile Aso 27 Aukuso 2021)
- $30 miliona (4.0%) o le a tuuina sao i saofaga i le Aso 1 Iulai 202
- Tau aofai o le meaalofa: $60 miliona
E fiafia tele le Komiti Faatonu, le Pulega ma le aufaigaluega a le NPF e faatino lenei faamoemoe e fesoasoani atu ai i o tatou tagata i lenei vaitau e le masani ai si o tatou atunuu.
O le faaneetaga, faafetai ma le viiga atoa e tuuina atu i lo tatou Atua Silisili Ese, le Alii o Iesu, o lé na te mafaia ona faafaulai ia te i tatou meaalofa uma; o loo faalavaina i aso uma ia te i tatou i mea uma lava, ina ia faulai ia te i tatou galuega lelei uma.
Faafetai
Komiti Faatonu ma le Pulega
