Tusia: Tusiga Taofiga
I le feagai ai o Samoa ma lenei vaitau o timuga, lologa ma matagi malolosi, e pei ona molimauina fo’i fautuaga mo se Tsunami ona o le mauga mu sa tupu i Tonga, ua maitauina ai le fa’atupulā’ia pea o ni gaioiga e lē mana’omia i taimi o fa’alavelave fa’afuase’i
Peita’i, ua vaaia pea ma le agaga fa’anoanoa e le Pulega o le Tineimu aemaise le Ofisa o Fa’alavelave Tutupu Fa’afuase’i ma Fa’alavelave Matuiā (N.E.O.C.) le fa’ata’aloga i vai e nisi o le mamalu o le atunu’u, le fa’atauvaga ona pu’e ata o ni fa’alavelave e tutupu fa’afuase’i ma tu’u i luga o upega tafa’ilagi ae natia ai le galuega fesoasoani e tatau ona muamua fai, o le valaau lea o le 911 po’o le Matāgaluega o Leoleo mo se fesoasoani.
Fa’ailoa e le Komesina o le Pulega o Tineimu ia Tanuvasa Petone Mauga, o le tele o nisi o fa’alavelave, e o’o atu le fesoasoani talafeagai ua fa’atamaia fale ua tuai fo’i ma ma’imau ai se soifua, ona o le ‘ave o le fa’amuamua i mea lē tatau e i ai le pu’e o ata ma fa’alauiloa i le facebook.
O le fautuaga a le Komesina mo Samoa, tautuana ia fa’aitiitia le manatu māmā i fa’alavelave e ma’imau ai le soifua.
Na molimauina fo’i ina ua tupu le fa’alavelave sa tula’i mai Tonga, na vaaia ai e le Komesina fa’apea lana aufaigaluega le to’atele o le mamalu o le atunu’u ua nofonofo i taligalu ma pu’e ata o le sami, ma matamata pe ono tupu se galulolo pe leai.
O ia uiga, e lē mana’omia e le Mālō, ma e momoli ai pea le agaga o le fautua ma le tima’i mai le Komesina ma le Komiti o le N.E.O.C. ina ia tautuana Samoa, ‘aua le fa’ama’imaua le taimi i ni gaioiga lē talafeagai e fa’atupu ai le fia matamuamua ma le fia iloa ae fa’agalo ai galuega fesoasoani e tatau ona mua’i ‘ave i ai le fa’atāua pe a o’o ina tupu i so’o se taimi.
