Tusia: Tusiga Taofiga
Tapusatele Maukeni Tamasone Metuli ma Mafasolia Vaai Papu Vaai – o i lāua sa avea ma Faipule o le Palemene i nisi o nofoa’iga ua mavae.
Na fofogaina i totonu o le Palemene i le taeao ananafi, tala’aga o le soifua tautua o nisi o tamāli’i sa avea ma Faipule mai o la Itumālō Fa’apalota i paea’iga ua mavae, e fa’ailoa ai le tula’i fa’aaloalo a Sui Usufono o le Maota ona ua tu’umālō.
O le tula’i fa’aaloalo mo le minute e tasi a le Palemene, o se fa’aaloalo masani lea e fa’atino pe a tuua le mālō e se sa avea ma Faipule o le Fono Aoao Faitulafono.
O le taeao fo’i na ananafi na avea ai le Afioga i le Fofoga Fetalai o le Maota ia Papali’i Li’o Oloipola Ta’eu Masepa’u ma Sui o le Palemene atoa fa’apea Samoa aoao, e fofogaina fa’amaisega ma fa’amafanafanaga a le atunu’u atoa mo le motusia fa’afuase’i ai o le mafutaga a nei tamāli’i ma o latou aiga pele.
O le Afioga ia Tapusatele Maukeni Tamasone Metuli II Esera, na maliu i le Aso Lulu 08 Tesema 2021, o le sa avea ma Faipule mo le Itumālō Fa’apalota i Vaisigano #2 mo le paea’iga lona 16 a le Palemene mai le tausaga e 2016 – 2021.
Sa avea ma Sui Tauva mo le Vaega Fa’a’upufai e Puipuia Aiātatau a Tagata – H.R.P.P.
Na filifilia o ia i nisi o Komiti Fa’apalemene e aofia ai le Komiti o Vaega Tau Tamaoā’iga ma le Komiti o Vaega o Atina’e ‘Ese’ese.
O le Afioga ia Hon. Mafasolia Vaai Papu Vaai na tu’umālō i le Aso Gafua 17 Ianuari 2022 i Aukilani Niu Sila.
Na filifilia o ia e avea ma Faipule mo lona Itumālō o Falealupo i le paea’iga lona 12 a le Palemene mai le 1996 – 2001 i le fa’amalu a le Vaega Fa’a’upufai e Puipuia Aiātatau a Tagata.
Na tofia o ia e avea ma Minisitā o le Matāgaluega o Fa’amasinoga mai le 1996 – 1998, toe tofia e avea ma Minisitā mo le Matāgaluega o Fa’ato’aga mai le 1998 – 2001.
Na toe manumālō mai o Mafasolia i le palota na soso’o ai mo le paea’iga lona 13 mo le Itumālō o Vaisigano #1 ae sa avea ma Sui Tuto’atasi.
Na filifilia o ia i le Komiti Fa’apalemene o Galuega o le Maota, Komiti o Tupe Maua ma Tupe Totogi, Komiti o Matā’upu Tau Faigāpalota, Komiti o Amio Tauāloa a le Palemene ma le Komiti o Fa’alapotopotoga ma Iuni Fa’apalemene.
O Mafasolia o le atali’i o se tasi o tamāli’i sa avea ma Palemia o Samoa, le Afioga ia Vaai Kolone.
Saunoa manino Papali’i, o uiga tausa’afia sa fa’aālia e nei tamāli’i a’o avea ma Faipule o le Fono Aoao Faitulafono, o se oso tāua lea auā le faigāmalaga a lenei nofoa’iga lona #17 a le Palemene o lo’o ua amatalia.
O le Afioga ia Tapusatele ua lagomau i lona ti’asa, se’i vagana ai le Afioga ia Mafasolia Vaai Papu e le’i fa’ailoa mai e lona aiga i le taimi nei, fuafuaga mo ona toe sauniga.
