Tusia: Tusiga Taofiga
Failautusi o le Ofisa o le Fono Aoao Faitulafono a Samoa ma le Sui Failautusi
Ua fa’ailoa e le Fofoga Fetalai le fa’ata’atia ai i luma o le laulauafono a le Fono Aoao Faitulafono a Samoa le lipoti o su’esu’ega ua mae’a fa’atinoina e le Failautusi o le Ofisa o le Fono Aoao Faitulafono e tusa ai ma le finagalo sa folasia e le Loia Sili a le Mālō.
Saunoa le Fofoga Fetalai ia Papali’i Li’o Oloipola Ta’eu Masepa’u sa fa’aāli manino e le Loia Sili e telē se lape sa tula’i mai i le ‘ese’esega o Tulafono sa pāsia e le Palemene ma le Tulafono na tu’uina atu mo le saini ā’ao ai o Lana Afioga i le Ao o le Mālō Tuto’atasi o Samoa.
O le popolega o le Fofoga Fetalai, ona e ‘ese’ese fo’i kopi sa pāsia ma le kopi o lo’o tu’uina i luga o upega tafa’ilagi fa’atasi ai ma kopi o lo’o fa’atau atu i le mamalu o le atunu’u, ina ne’i avea le ‘ese’ese o kopi o le Tulafono ma ala e ono faitau ‘ese’ese pe fa’asesēina ai fo’i le mamalu o le atunu’u i le lumana’i.
Saunoa Papali’i talu ai ona o le mo’omia pea o le vave fō’ia o lea fa’afitauli, o le ala lea e tatau ai ona vave tagofia e le Palemene i se taimi lata mai.
O lea Tulafono o lo’o ta’oto ai nisi o matā’upu o lo’o tagofia e le Fa’amasinoga i le taimi nei.
O ia Tulafono e aofia ai le Teuteuga o le Fa’avae o le Mālō o Samoa, fa’atasi ai ma le Tulafono o Fanua ma Suafa 2020.
O se taimi o lenei vaiaso, o le a ono tagofia ai e le Palemene le Lipoti o le Su’esu’ega a le Failautusi o le Ofisa o le Fono Aoao Faitulafono mo sana fa’ai’uga talafeagai e fō’ia ai lea fa’afitauli ua tula’i mai.
