Tusia: Taunuuga Toatasi
E le fa’apito manuia tasi i avanoa tutusa e maua e tagata uma mo galuega fa’avaitaimi i Niu Sila ma Ausetalia.
Ua i ai nisi o fa’afitauli ua tula’i mai, e pei ona i ai se ata sa fa’asalalau solo i luga o le facebook o fusuaga a nisi o tama’ita’i o lo’o galulue i galuega nei.
I le feiloa’iga a le Savali ma le Ofisa Sili o Pulega a le Matāgaluega o Pisinisi, Alamanuia ma Leipa ia Pulotu Lyndon Chu Ling na ia fa’aālia manino ai le fai lea o su’esu’ega i le matā’upu lea ma a mae’a ona fai loa lea o se fa’ai’uga i ai.
E leai se tulaga fa’apea o le a fa’amuta ai avanoa mo tama’ita’i, ona o le naunauta’iga o le Mālō, ia maua avanoa tutusa mo tagata uma.
“O le agaga atoa o le Mālō i le polokalame lenei, o le avanoa tutusa mo tagata uma, ali’i ma tama’ita’i i le sa’iliga o manuia mo aiga.
“E tutusa uma lava ali’i ma tama’ita’i i le tulaga lea o le fusu, ae o le tulaga ua telē ai le fa’aletonu, o le fetagofi o tagata pu’e ae tu’u i luga o le facebook.
“O le tulaga la e o’o i ai ituā’iga amioga nei, e i’u ina toe sui ai aiaiga o faiga fa’avae ma taofia ai le so’ona malaga o tama’ita’i i galuega fa’avaitaimi.
“E le’i ōatu e fai ni fusuaga, na ōatu e galulue e sa’ili ai manuia mo aiga o lo’o tapua’i atu.
“Atonu e lelei i se isi itu, o lea ua tatou iloa atu ai mea o lo’o tutupu i ō, a’o le leaga, ona o le tu’u i luga o le facebook ma fa’asalalau solo, ae manatua e lē to’atasi pe to’alua tagata e matamata i le ata lea, e matamata i ai le lalolagi atoa.
“O le agaga lea e afua ai ona fai feiloā’iga ma i latou nei ae le’i tu’ua le atunu’u mo galuega fa’avaitaimi, e fa’amanatu uma i ai vaega ia, ae lē nātia o le natura lava lea fa’aletagata o fa’afitauli e tutupu i le tele o taimi.
“Atonu fa’atoā iloa ane, ua salalau solo i luga o le initaneti uiga matagā nei.
“O lo’o galue le tatou so’o’upu i le su’esu’ega o lo’o fai, ma a maua ane le mafua’aga e ogaoga ma e a’afia ai le latou galuega, e leai lava se isi fa’ai’uga o le toe fa’ati’eti’e i le va’alele ae aumai iinei.
“E le’o se mea faigofie le tau sa’ilia o se avanoa e aumai ai se isi, ona o le tulaga o lo’o fetu’utu’una’i ai malaga ona o le fa’ama’i.
Na fa’aālia fo’i e le Ofisa Sili o Pulega le telē o le sao o ali’i ma faipule ae fa’apea fo’i fa’afeagaiga o alalafaga uma lava o lo’o nonofo ai i latou o lo’o malaga i galuega nei.
“E fai tautalaga o fautuaga ae fa’apea fo’i le galuega a le Mālō o lo’o fa’atino e tima’i ma fautuaina ai so’o se aumalaga lava ae le’i ō, a’o lea lava e tutupu lava fa’afitauli nei.
“O le naunautā’iga lea e i ai, ina ia vave ona sui le mafaufau, ia maua mafaufauga e sa’ili manuia ai, ae le’o mafaufauga e sa’ili ai po’o ai e sifi.
“O galuega fa’avaitaimi e sa’ili ai manuia o aiga, nu’u ma ekalesia, e tatau ona fa’aaogā tatau, fa’aaogā lelei avanoa ua maua.”
O le aofā’iga o tagata Samoa o lo’o galulue i galuega fa’avaitaimi i Niu Sila e tusa ma le 2,000, a’o Ausetalia e tusa ma le 3,000.
