Tusia: Tusiga Taofiga
Ua fa’ailoa e le Ta’ita’ifono o le Komiti o Fa’alavelave Tutupu Fa’afuase’i ma Fa’alavelave Matuiā (N.E.O.C.) o ia fo’i o le Failautusi a le Kapeneta ia Agafili Tomaimanō Shem Leo, e silia ma le 20 miliona tālā le seleni a le Mālō ua fa’aaluina mo le fa’atupeina o galuega uma o le fa’anofoesea talu mai Mati o le tausaga 2020.
O le tausaga nei ua fa’ailoa manino ai e Agafili se tōfā ua a’e i le Kapeneta ina ia fa’amatu’u ‘ese atu lea galuega mai le Mālō se’i vaganā ai nai vaega itiiti e fa’aauau pea ona totogi ma fa’atupe e le Mālō a’o le seleni fa’aalu mo le fa’anofoesea o tagatanu’u Samoa e malaga mai o le a gafa lea ma i latou lava.
Fa’ailoa e le Ta’ita’ifono, mo nai gasegase o lo’o si’ima’i i atunu’u i fafo e ala i le fesoasoani a le Mālō, o i latou tonu na o le a ono fa’aauau pea ona totogi e le Mālō le fa’anofoesea.
I le maitau a le Komiti o le N.E.O.C. ua i ai nisi ua fai ma masani, le malaga i fafo ma toe fo’i mai ae ‘ese mafua’aga sa fa’ailoa atu ua āfua ai ona tatala le avanoa e malaga ‘ese atu ai ma Samoa peita’i e lē sa’o.
O i latou tonu ia, ua fa’ailoa e Agafili, e tatau ona totogi lava e le tagata le fa’atupega o le taimi atoa a’o fa’anofoesea ai.
Mai nei tausaga e lua talu ona a’afia le lalolagi i le Koviti – 19, ua fa’ailoa e Agafili, ei le va o le $3,000 – $5,000 le tupe alu a le Mālō mo le tagata e to’atasi a’o fa’anofo va’ava’aia ai mo le tolu vaiaso i nei nofoaga fa’apitoa.
I le taimi nei o lo’o feagai le Komiti N.E.O.C. ma le fa’amaioio lelei o aiaiga mo le totogiina o le fa’anofoesea.
Saunoa Agafili, pe afai ae fa’aauau pea ona totogi e le Mālō le fa’anofoesea o tagata uma e malaga mai i le atunu’u, o le a ono o’o ai Samoa i se tulaga faigatā mo ana tupe fa’asoa mo auaunaga ‘ese’ese i le atunu’u.
