Lau Susuga i le Taitai o le Sauniga – Lau Susuga Siaosi Salesulu
Lau Afioga i le Ao Mamalu o le Malo ma lau Masiofo
Lau Afioga i le Sui o le Fono a Sui Tofia
Afifio Minisita o le Kapeneta
Lau afioga i le Faamasino Sili
Lau afioga i le Fofoga Fetalai o le Fono Aoao Faitulafono
Lau afioga i le Loia Sili ma Faauluuluga o Matagaluega
Le paia o le auvalaaulia ua mafai ona tatou faatasi i lenei taeao
Ou te faatalofa atu.
O lea ua malu maunu fogatia o tiaseu o alii, ina ua faaifo tuamafa fili malae. Ua goga foi le si’uamoa, ae tafa manino le laula’i, e faafeiloai le matagofie o ulufanua ma atululuga o Samoa, o le foafoaga mamana a le Atua. Ua malo afua ua maua, faafetai i le alofa tunoa o le Atua, ua afua ai ona tatou feiloai i Niniva ma Punialavaa nei, i le maota o le Ao Mamalu o le Malo i Vailele, i le soifua laulelei ma le lagi matafi.
Ua o tatou molimauina faatasi i lenei taeao le sauniga aloaia faale-malo mo le faatautoina o le Tamaitai Loia Sili – le Afioga Sua Hellene Wallwork – ua tofia nei na te tauaveina lenei tofiga taualoa o le Malo, mo se taimi a o faatino le sailia o se tasi e tauaveina, mo le tolu tausaga.
Ou te momoli atu le faamalo ma le faafetai i lau afioga i le Loia Sili i lou tulai mai e tauave lenei galuega taua mo le tatou Malo ma le atunuu.
O le tofiga o le Loia Sili o loo faataoto manino i totonu o le Tulafono Faavae, ma o se tulaga tofi taualoa a le Malo, e matua tele lona sao e fautuaina le Malo i tulaga faaletulafono uma, ina ia malu le fa i ana faatinoga, aemaise le tausisia o aiaiga uma o Tulafono o loo limataitaiina ai galuega a le Malo.
E le o po pe lilo le faataua o le mulimulitaia o aiaiga faaletulafono e faagaioi ai tiute ma matafaioi o le Malo, aua le tuuina atu o auaunaga i si o tatou atunuu. E faapena foi i le puipuia o le Malo ma le aufaigaluega mai i faatinoga e ono sopo tuaoi ai galuega, ma faaono nunu ai le toau, pe vaemanua ai le taumafai atu o le Malo, e faataunuu ona tiute mo le tautuaina o le atunuu.
O Su’a o se tamaitai Loia ua tele tausaga o tautua faaloia i Samoa nei. Sa amata lana tautua i le Ofisa o le Loia Sili i le 1999, ae lei tuua le atunuu mo isi faamoemoe tau i le galuega faaloia, ma toe taliu mai ai i le 2013 ma faaauau ai lana tautua i le Ofisa Loia o le Wallwork Lamb Lawyers. O ia foi o loo avea ma Peresetene o le Asosi Loia a Samoa i le taimi nei.
Ou te taofi, ua lava tapena le afioga ia Su’a e tauaveina lenei tofiga e tusa ma aiaiga o le Tulafono Faavae. O le agaga maualuga o le Malo, ia atagia pea tulaga aloaia o matafaioi faaletulafono, o aiaiga ma aulape i faatinoga uma, ma e taua tele ai le fautuaga a le Loia Sili.
O le matou tatalo, ia faamanuia le Atua i le tulai mai o le Tamaitai Loia Sili. Ia vaatele lau silasila i vala taua uma e saga matimati ai le galuega a lou Ofisa. Ia maua le agaga o le galulue feoeoeai ma Faauluuluga o itutino uma o le Malo, e lalago faatasi i lo outou faiva o le faufautua i le Malo. Tautuana, aua nei tuua le faufautua, o lou tiute lea.
Ia saga faatumu lau utu i le poto ma le faautauta mai le Atua. O a foi ni luitau o le a fetaiai, ia mau pea le to’ovae, ma faamoemoe pea i le faasino mai o le Atua, aua e na o la, tatou te mafai ai mea uma, e ala i lona Agaga Paia.
Ia faamanuia le Atua i lou tofiga.
SOIFUA.
