Aso Toonai 22 Ianuari 2022
Ou te faatalofa atu i le tapuaiga mau a si o tatou atunuu i lenei taeao fou. Faafetai i le alofa o le Atua ua taitai mai lo outou soifua laulelei, e aulia mai le faaiuga o lenei vaiaso. O paia faale malo, paia faale atunuu, paia o faale talalelei, o le a nuunuu atu faatini o tausala. O paia lava e le popo ma pa e le solo.
Ua faafofoga le atunuu i le faasalalauga na tuuina atu e le tatou Malo i le aafia ai o nisi na malaga mai i le vaalele mai Ausetalia i le Aso Lulu o le vaiaso nei, i le siama o le Koviti 19. E oo mai i le taeao nei ua toasefululima (15) i latou ua faamaonia ua aafia i le siama. O i latou uma nei na malaga mai i le vaalele ma o loo faanofoesea.
O se numera maualuga tele lenei ua aliae mai. Ma e ui o loo malu puipuia i latou nei ua aafia i nofoaga ua faanofoesea ai, peitai ua silasila le Kapeneta i vaega taua eseese uma e saga faamalosia ai le puipuia o le atunuu atoa mai lenei faamai, aemaise le tele o le avanoa e ono mama ai i tua ma pesia ai le atunuu.
O le ala lea ua faaigafonoina ai e le Kapeneta e faavae i luga o fautuaga na tuuina mai e le Komiti o Faalavelave Tutupu Faafuasei ma Faalavelave Tutupu Matuia, le siitia o le tatou puipuiga (Alert level) i le vaega lona tolu, po o le lanu mumu.
Ou te faasilasila aloaia atu ai, o le a tapunia atoa le atunuu (lockdown) mo le 48 itula e afua atu i le ta o le 6.00 i le afiafi o le asō – Aso Toonai, 22 Ianuari 2022 seia aulia le ta o le 6.00 i le afiafi o le Aso Gafua, 24 Ianuai 2022.
A o talimau le atunuu i o latou maota ma laoa, ua na o le aufaigaluega ua faatagaina o le a faaauau pea o latou tiute mo le tuuina atu o auaunaga moomia mo le soifua (essential services) ma le tali atu i ni faalavelave faafuasei e moomia mai i le atunuu. E faapena foi i taavale afi, o le a le faatagaina ni taavale e feoai ae ua na o taavale ua faatagaina mo le faatinoina o auaunaga o le a tuuina atu.
O vaega uma o le a aofia i lenei fuafuaga, e aofia le taofia o galuega sei vagana ai auaunaga moomia mo le soifua (essential services), tapunia o aoga, taofia o soo se femalagaiga, faleaiga ma faleava, tapuaiga, atoa ma le faamalosia o le talimau o tagata uma i o latou lava aiga.
O le a toe Iloilo toto’a e le Kapeneta lenei fuafuaga a o faagasolo, ma toe fofogaina ai le atunuu mo nisi suiga talafeagai e fuafua i le tulaga ua iai le mataituina o i latou ua aafia.
O le a feagai le Malu o le Malo ma le puipuiga o le saogalemu lautele o le atunuu. O le a feagai pea le Komiti o Faalavelave Faafuasei ma le tuuina atu i isi faamatalaga moomia uma mo le silafia e le atunuu.
Samoa e, o le tatalo a le tatou Malo, ia o tatou maua pea le toafilemu, ma ia tatou faatuatua pea i lo tatou Matai sili, e alofagia si o tatou atunuu, a o tatou feagai ma nei toatugā ua aliae mai. Matou te talosagaina le lagolago a le atunuu i lenei fuafuaga ina ia sao ma uli lo tatou faamoemoe.
Ia manuia le tapuaiga a Samoa. Ia faalototeleina foi le aufaigaluega uma o loo galulue mo le puipuiga o Samoa mai lenei faamai, ma ia tatou taufai momoli talosaga mo si o tatou atunuu.
SOIFUA