O le faatalatalanoaga o se vaega o galuega faatino o le poloketi atoa mo le fausiaina o le Faatonuupu. Ae o se galuega tele sa manaomia ai se taimi umi e faatino ai.
O lenei galuega oloo faatupe lava e le Malo o Samoa tauala mai i le Matagaluega o Aoga Taaloga ma Aganuu, ma oloo faipaaga ai le Matagaluega, o le Komisi o le Gagana Samoa ma le Iunivesite Aoao o Samoa.
O autu ma le faamoemoe o lenei Tusi faatonuupu o le a avea ma:
1). Ta’iala i le sipelaina o upu, fa’aaogaina o fa’ailoga o le komaliliu ma le fa’amamafa ma le kalama.
(2). Fa’ataua ma fa’atumauina ma ia ola pea le Gagana Samoa i le lumana’i.
(3). Fa’amanatu e tamaoa’iga le Gagana Samoa i upu ae ua fa’atuatuana’i iai.
(4). Fa’amautū e le puleesea le Gagana Samoa o le tofi o Samoa mai le Atua.
(5). Auala e fa’alaugatasia ai le a’oa’oina o le Gagana Samoa e afua mai i a’oga tulagalua e o’o i le Iunivesete Aoao.
O galuega na amata ona faatino fonotaga mai i le aso 8 Iuni, 2020 ae ua faaiuina I le aso 25 Fepuari, 2021. E tusa ma le 9 masina sa faatino ai lenei galuega. E 23 sui lesitala e 19 Alii ma le 4 tamaitai.
O nei sui auai sa filifili mai i tamalii o le atunuu oloo i ai le agavaa ma le silafia i mataupu tau aganuu, o atamai faapitoa i mataupu tau i le gagana , talafaasolopito, ma agaifanua o le atunuu.
O se galuega sa mau tōfā ai sui auai i vaega eseese o le gagana, sa faasoa, soālaupule ma iloilo tusiga o uiga talafeagai o upu taitasi, iloilo ai alagaupu, muagagana e talafeagai mo le galuega.
Sa faafoeina lenei galuega e le Ofisa o le Komisi o le Gagana Samoa ma le Matagaluega.
