“8 TAGATA UA FAAMAONIA UA AAFIA I LE KOVITI-19“
(OFISA SOOUPU):- E oo mai i le aso, 07 Mati 2022, e toa valu (8) le pasese mai le faigamalaga mai Niu Sila i le Aso Sa, 06 Mati 2022, ua faamautinoa mai e le Matagaluega o le Soifua Maloloina ua a’afia i le siama o le KOVITI-19 i le maea ai o le latou suesuega (tests) muamua. O i latou uma nei o lo’o mataituina pea e le Matagaluega o le Soifua Maloloina ma faanofoesea mo le taimi nei.
O loo faanofoesea ma mataituina foi le 162 o le pasese o le faigamalaga mo le taimi nei ma ua faamaonia mai ai e leo aafia i le faamai o le KOVITI-19 i le maea ai o le latou suesuega (PCR tests) muamua. E faapea foi le aufaigaluega e 127 sa ofoina le auaunaga i le malaevaalele i Faleolo, o loo faanofoesea ma nofo vaavaaia mo le 72 itula, ma e leo i ai lava se tasi ua alia’e mai iai ni auga o le fa’amai.
O loo tumau pea le malu puipuia o le atunu’u e aunoa ma le pepesi i tua o le fa’amai.
O loo faaauau pea ona i ai Samoa i le La’asaga muamua o le puipuiga mai le faamai (Alert Level 1). E fautuaina foi le mamalu o le atunuu ina ia faia pea talifofoga, mataituina le va ma isi tagata (2meter social distancing), ma ia fufulu aao i taimi uma.
E fautuaina foi le mamalu o le atunuu, e matuā tapu so’o se tagata e uia pe afea Nofoaga o lo’o fa’anofoesea ai (Quarantine sites) i latou na faimalaga mai i atunuu mamao.
Mo nisi faamatalaga, faafesootai mai le Ofisa o Faalavelave Faafuasei (NEOC) i le numera telefoni 997, poo le Matagaluega o le Soifua Maloloina i le 8006440 ma le 911 | 22222 mo ni faalavelave faafuasei.
E talosagaina pea le lagolago a le atunu’u i le tau’aveina fa’atasi o lenei fa’amoemoe, mo le puipuiga ma le saogalemu o si o tatou atunu’u.
