(SO’O’UPU A LE MĀLŌ): I le mae’a ai o le fa’asalalauga fa’apitoa mai le Afioga i le Palemia, Fiame Naomi Mataafa i le asō, ua fa’ailoa mai ai o le pasese mulimuli sa a’afia i siama o le Koviti – 19 na malaga mai le faigāmalaga o le Aso 19 Ianuari 2022, ua te’a i tua i lona aiga ananafi, Aso Lulu 23 Fepuari 2022 i le mae’a ai o ana su’ega (tests) e tolu soso’o, ma ua mautinoa ai le kilia atoatoa o ia mai le fa’ama’i.
Peita’i, o le to’alima o tausi soifua sa a’afia o lo’o fa’aauau pea ona fa’anofoesea ma o lo’o manuia uma i latou e aunoa ma ni āuga o le fa’ama’i o alia’e mai ai ma o lo’o tumau pea le malu puipuia o le atunu’u e aunoa ma le pepesi i tua o le fa’ama’i.
O le pasese e 272 sa malaga mai le va’alele a le Air Niu Sila i le Aso 12 o Fepuari 2022 o lo’o fa’anofoesea pea i le taimi nei mo le 21 aso. I totonu o le 7 aso talu ona fa’anofoesea i latou nei, e tolu su’ega (tests) sa faia ma fa’amauina ai le leai lava o se tasi ua a’afia i siama o le Koviti – 19.
FA’AMAUMAUGA O LE TUIGA I LE TAIMI NEI;
E o’o mai le asō, o le aofa’i lea oi latou ua fa’amauina ua mae’a o latou tui o le Koviti – 19;
- AstraZeneca
- Tui Muamua – 97.5%
- Tui lona Lua – 89.5%
- Pfizer (12-18 tausaga)
- Tui Muamua – 92.2% (25,801)
- Tui lona Lua – 77% (21,479)
- Tui Fa’aopoopo (Booster Shots)
- Tama’ita’i – 2,212
- Ali’i – 2,258
- Aofa’i atoa – 4,470
O le a fa’ailoa atu se taimi e fa’atinoina ai tui puipui o alo ma fanau e i lalo ifo ma le 12 tausaga agai atu i le 5 tausaga, pe a taunu’u mai tui puipui (pediatric vaccine) i se taimi o i luma.
……..MAEA……
