PEPA O FA’AMATALAGA (Aso Faraile, 25 Mati 2022)

FA’AGASOLOGA O LE TUIGA MO LE KOVITI – 19

A’o fa’aauau ai pea le tapunia atoa o le atunu’u e tusa ma le La’asaga #3, o le Poloā’iga o Fa’alavelave Fa’afuase’i – lanu mūmū, o lea e fautuaina ai le mamalu o le atunu’u, o le a fa’agasolo nei e le Matāgaluega o le Soifua Mālōlōina le tuiga o le Koviti – 19 mai totonu lava o lou sa (ta’avale) i le Aso To’ona’i, 26 Mati 2022 i le 8:00 i le taeao se’ia mae’a i le 2:00 i le aoauli.

O lenei tuiga e aofia ai i latou e 18 tausaga aga’i luga le mātutua o lo’o fia faia o latou tui fa’aopoopo (booster shoots), ma ia lei lalo ifo o le 3 masina talu ona mae’a faia tui e lua muamua o le Koviti – 19, o le tui mo fanau 12 – 17 tausaga le mātutua fa’apea ai ma fanauiti e 5 – 11 tausaga.

O nofoaga nei e 8 ua fa’atulagaina mo lea fa’amoemoe;

1. Maota lanu moana o le EPI a le Matāgalueg o le Soifua Mālōlōina fa’afesaga’i tonu ma le Faleoloa o Seb ma Rene i Moto’otua
2. Paka i Malaefatu fa’afesaga’i ma le Tanoa i Sogi
3. Ofisa o le Fa’alapotopotoga o Su’esu’ega Fa’asaienisi a Samoa po’o le S.R.O.S. (Scientific Research Organization of Samoa Compound) i Papauta
4. O lumā maota o le Fale o le Mālō – FMFM II i Matagialalua
5. Maketi i Vaitele
6. Fale Ta’alo #1 o le S.S.F.A. i Tuana’imato (Gym 1)
7. Fale Ta’alo po’o le Multi-Purpose Gym a le S.S.F.A. i Tuana’imato
8. Ka Paka i le Apia Park.

Mo lenei fa’amoemoe, e tatalo atu ai ma le agaga maulalo i le mamalu o le atunu’u ina ia tausisia vaega tāua nei, auā lava puipuiga o si o tatou atunu’u mai le pepesi ai o lenei fa’ama’i. O ia vaega e aofia ai;

• Fa’aāoga tali fofoga i taimi uma (tagata mātutua ma fanau)
• Tauā’ao mai lou pepa tui o le Koviti – 19
• Ia mautinoa le faia o se mālū taeao / ti taeao a oe ma lau fanau e taofia ai le ono mole manava ma tupu ai se isi fa’afitauli e lē tatau ona tula’i mai
• Aumai le kopi o lou pepa fanau po’o lou tusifolau mo fa’amaumauga o le tuiga
• E mo’omia le fa’atali o oe po’o lau tama (child) i le 15 – 20 minute i nofoaga o lo’o fa’atino ai tuiga pe a mae’a ona faia lou tui.

Matou te fa’alagolago atu i lo outou mamalu, ina ia tatou galulue fa’atasi e puipuia Samoa mai lenei fa’ama’i mata’utia.

March 26, 2022 Source