45 tagata ua aafia talu ona sao i tua le Koviti 19
I le maea ai o le saunoaga a le Tamaitai Palemia anapo e fofoga le atunuu i laasaga mo le puipuiga, aemaise le faailoa o le 11 o tagata ua aafia i le Koviti 19, na faailoa mai e le Matagaluega o le Soifua Maloloina i le tuneva o le po anapo, ua faaopoopo le isi 34 tagata ua aafia, ma ua se’e atu ai i le 45 le aofai o i latou ua aafia talu ona sao mai i tua le faamai.
O le 17 o i latou nei ua alia’e ai auga e pei o le fiva, tino gagase ma le tiga o le fa’aī. O loo vaavaia i latou uma nei i nofoaga faanofoesea i le Falemai i Motootua. O isi o i latou uma nei, e le o iai ni auga ma ua faase’e atu i nofoaga ua faanofoesea ai.
Ua iai nei le atunuu i le laasaga lona tolu (lanu mumu). Ua tuuina atu foi aiaiga o vavao mo le tatou puipuiga. E talosagaina le atunuu ina faatino uma puipuiga faasoifua maloloina e pei ona faalauiloa atu, e pei o le faia o talifofoga, tauave le pepa tui, fufulu mama lima, ma ia talimau i aiga ma taofia le soona fesootai atu i tagata atoa ai ma le soona feoai, ina ia tau taofiofi le pipisi o le faamai. Ia tautuana le mulimulitaia o aiaiga ua faatulaga mo le laasaga 3 o lo tatou puipuiga.
