Ou te faatulou atu i le paia o lenei sauniga mamalu. Le susu o lau susuga i le Taitai o le Sauniga, e faapea foi le paia o le aufaigaluega totofi a le Atua o sasao nei. Susu le Sui Palemia ma le Kapeneta. Afifio le paia o aiga ma gafa na sausau sema, uo ma e masani, ua potopoto i le malumalu tapuai nei, tatou te molimauina le toe sauniga o le Afioga i le Aloalii – le afioga ia Vaai Solia Papu Vailupe.
Talofa ua ta’atiu ma matagitogaina; ua tafea le tauofe. Ua lagia ai maota e fia, ae ua ifo le toega o malama i Falepaū, e afio ai le Aloalii. Talofa e, i le Fala se’ese’e ma le lauu’a a Nafanua, e auafa mau i Fili ma Puletu’u, auā ua to le ‘ua faavauvau i le Fuiono. Tulouna le tuua o le Malo, i le afioga i a Vaai po o le afioga i a Solia.
Ou te faafetai atu mo le avanoa, ou te faaleoina ai le molimau a le tatou Malo i le soifua tautua o Vaai i upufai o Malo, e ala i le tofiga faipule o le Maota Fono o Samoa.
E pei ona faamauina i talaaga o le Palemene, sa muai tofia le afioga i a Mafasolia i le Aso 22 Aperila 1991 i le paeaiga lona 11 o le Palemene. O le Sui-a- Faipule o le Itumalo Faaalalafaga o Falealupo, i le maea ai o le faiga palota tele a le atunuu i lena tausaga. O se tausaga faagalogātā i lo tatou tala faasolopito, ona o le aafia ai o Samoa i afa fulifaō o Ofa i le 1990, ma Valelia i le 1991. Na matua faaleagaina ai le atunuu atoa i le matautia o nei afa soso’o. O le vaitau lea sa uluai ulufale ai Solia i le Palemene.
Ma i lana lauga faataupou i le aso 24 Iuni 1991, sa ia matuā faamamafa ai manaoga o lona Itumalo o Falealupo i le atiinae o le vai taumafa mamā, falema’i, auala gālue, eletise, atinae o turisi, taligalu, malae vaalele ma le soifua lelei o tagata o le Itumalo. E le’i alo foi le saunoaga a Solia, i le toe faamanatu i le Palemia ma le Kapeneta i lena vaitau, o Falealupo o se tasi lea o Nuu ma matuā mafatia i afa o Ofa ma Valelia, ma e ao ona ave i ai le faamuamua.
Sa toe filifilia Solia i le paeaiga na sosoo ai i le 1996 i le 2001 mai le Itumalo Faaalalafaga o Falealupo. O le tausaga lea na filifilia ai Solia i le tofiga o le Minisita o Faamasinoga mai 1996 – 1997. Ona toe filifilia lea e avea ma Minisita o Faatoaga mai i le 1998 – 2001.
I le paeaiga lona 14 a le Palemene (2006-2001) sa filifili mai ai le afioga i a Vaai, i le Tofi Faipule o le Itumalo o Vaisigano Numera 1, i le Aso 13 Aperila 2006. I lena paeaiga sa tofia ai Vaai i Komiti Faapalemene e aofia ai le Komiti o Tupe, Komiti o Faigaplaota, Komiti o Tulaga taualoa ma aloaia o le Maota, ma le Komiti o Asosi Faapalemene.
O saunoaga a Vaai i le Palemene i lena vaitau, sa toe faamamafa ai le atiinae o le itumalo i le suavai mamā, eletise ma auala gālue, ae lautua i lana fautuaga i le silasila o le Malo e lufilufi lima lelei le tamaoaiga o Samoa. Sa ia lāgā ai foi le tatau ona siitia totogi o le aufaigaluega a le Malo ma le Palemene, ma le tāua o le toe lalagaina o le atinae o faatoaga e tua iai le atunuu. E faapea foi i aoga ma le soifua maloloina. O itu tetele ia o le tamaoaiga o le atunuu, lea lava e oo mai i le asō, o loo faaauau pea e le tatou faigamalo ona faamuamua.
A fua i lona soifua auauna ma le faaauau mai o le tautua a lona tuua, le afioga i a Vaai Kolone i upufai o Malo, ua afulelea ma ua tautala aso. Ua iloga foi ona lagisoifua, e le gata i le atinae o Itumalo sa tautua ai o Falealupo ma Vaisigano Numera 1, ae faapea foi i lana tautua o se Minisita o le Kapeneta, ma le tele o tofiga o komiti faapalemene sa ia auauna ai.
O lenei ua sili ofe le tautai, ua ifo le taulaumea, ma goto le la o lana auaunaga i a Samoa, i le pulapula lagoto ai o lona soifua.
Ou te avea ai lenei laolao, e molimoli atu ai le faafetai tele a le tatou Malo i le soifua auauna o le afioga i a Vaai. O lona sao i upufai o Malo, ma lana tautua i le atunuu ma Itumalo sa galue ai, ou te taofi, o lana taulaga lea sa tuuina atu i le Atua mo Samoa. Ma, tatou te auai faatasi i la tatou faafetai i le Atua, i lona aumaia o Vaai, ma ana meaalofa, o tomai ma agavaa sa ia tuuina iai, e tautua ai si o tatou atunuu.
Fo’i ia lona tino e tofā i le tu’ugamau, ma lona agaga i aao o lo tatou Atua, a o ana galuega e mulimuli atu i a te ia, ma e manatua pea.
Le paia o aiga, le Faletua ma le nofoaalo, faafetai tele mo nei tausaga e tele sa outou tuitui malofie ai, ma seu i falevaai, a o seu i falemua le afioga i a Vaai, auā lana tautua i le Palemene.
Tatou loto tetele pea, ma faamafanafanaina e le Agaga o le Atua le Faletua ma le nofo-a-alo, o aiga, o paolo ma gafa. Auā ua o tatou mautinoa, e lē mafai e le ola, po’o le oti, e le mafai e agelu po’o le malosi o lenei lalolagi, po’o se mea i onapō nei, po’o mea atalī, po’o le maualuga po’o le loloto, po’o se isi lava mea i le foafoaga, ona faateaeseina i tatou mai le alofa o lo tatou Atua, ua i a Iesu Keriso. O le mea lea, tatou te lē soona faanoanoa ai, auā o i le lagi lo tatou taui e tele.
O lea ua folau Vaai e tofa i lona tuugamau, a o tatou, e iai foi le aso ua tapenaina e le Atua, e mānava ai a tatou galuega i le ola nei.
Tau ina ia tafimala le faigamalaga a le afioga i le Aloalii, seia totogo ane le malama o le siitiaga, i le Nofoalii e faavavau.
SOIFUA.
