(29 AOKUSO 2021);
Susuga i le Taitai o le Sauniga, Susuga Mariota Siaea
Afio lau Afioga i le Ao Mamalu o le Malo ma lau Masiofo
Afio lau Afioga o le Fono o Sui Tofia ma le Faletua,
Afifio Minisita o le Kapeneta ma o outou Faletua
Sui o Malo mai Fafo poo le Diplomatic Corp, Taitai o Ekalesia Kerisiano uma i Samoa
Faauluulga o Matagaluega ma Faalapotopotoga a le Malo, ma Pisinisi Tumaoti,
O susuga i Faafeagaiga ma o outou Faletua, o loo faafalelemalu i nuu ma afioaga ona o le Talalelei.
O le usoga a Tumua ma Pule, Ituau ma Alataua, Aiga i le Tai ma le Vaa o Fonoti ma Samoa le Atunuu pele.
• O lea ua lalafu tai o gogo ina ua faaa’e ona faiva sa mamanu ma mama’e i fisaga o le la’i, aua ua maea siitia le atu i aleaga e ala i le auauna a le Atua ua fai ma o tatou ositaulaga, faamalo faafetai tapena.
• Ae ua tepa nei i ula ae tago i ula ua futifuti fa’amanuula lenei aso taupoina o le lona 31 ai nei o tausaga o faaaliga o le Teuila i Samoa.
• E le toe tau fesiligia le tulaga pagatia o lenei atinae ma le alamanuia o tagata tafafao mai, ona o le faamai ua aafia uma ai le lalolagi le Koviti 19. Ua atoa ai le 2 o tausaga o faatinoina pea vavao ma sa aemaise o le taofia o femalagaiga i va o atunuu o le lalolagi ona o lenei faamai matautia. O le tausaga ua mavae 2020, sa le mafai ai foi ona faatino se Faaaliga o le Teuila e pei ona masani ai i tausaga taitasi, ona o le manumanuga lava ma puipuiga o le Koviti, ae sa faaaogaina ai ala o fesootaiga i Televise e toe maimoa ai i faaaliga o tausaga ua mavae. O lea foi ua toe taunuu i ai se faaiuga a le Kapeneta ma le Komiti o tapenaga o lenei tausaga 2021, ina ia faaaogaina foi ala o fesootaiga i luga o Televise e faaalia ai ni ata o faaaliga o tausaga ua mavae mo maimoaga a lo tatou atunuu, ae le gata i lea o le faia o se faaaliga o oloa faalauiloa (Teuila Night Market) mo aso e 2 aua le mamalu o le atunuu.
• O le atinae ma le alamanuia o Tagata Tafafao Maimoa mai Fafo, o se matafaioi e tausoa ma tauave faatasi e tagata uma o lo tatou atunuu, e ala i lou sao o le faamamaina ma faamatagofie Samoa ma ona laufanua, o le tausisi lea i le saogalemu o tagata malaga tafafao mai fafo faapea soo se auaunaga.E ui lava o le faamai o loo aafia ai le lalolagi, ae le o malolo ai le tatou Pulega i ana galuega faifaipea ina ia faatumauina pea lenei alao’a mo Samoa ma ona tagata. O lea o loo faatinoina ai pea aoaoga mo tatou tagata ua vaea mai galuega, ina ia siitia pea le tomai e toe saili ai nisi faamanuiaga, aemaise o le faatumauina o le lelei o le auaunaga pe a toe tatalaina femalagaiga faa-va-o- malo ma toe agai mai turisi e asiasi mai Samoa. Ua avea foi lenei avanoa, ua maua ai e o tatou lava tagata tau maualalo talafeagai o faletalimalo, e fai malologa i ai aemaise lava aso faapitoa i lo tatou atunuu, ma ua siitia ai pea le tatou lava maketi ma ua avea ai o tatou tagata ma turisi e asiasi i faletalimalo (domestic tourist)
• O le faamoemoe o lo tatou malo i lenei alamanuia, ia fesoasoani tele lea mo le siitia o le tamaoaiga o Samoa aemaise o aiga taitasi. O le naunautaiga ia maua e Samoa atoa lenei vaiaso i le manuia ma le faatasi mai o lo tatou matai sili i le lagi, ma ia folau i lagi ma lo tatou sa, ina ia aua lava nei afe se Atua o le ala. Tau ina ia Agalelei ma puipui mai le Atua ia Samoa, ina ia aua aua lava nei ofi mai lenei faamai i o tatou laueleele.
IA FAAMANUIA MAI LE ATUA O SAMOA I LENEI VAIASO.
MA O’U TE FAASILASILA ATU
UA TATALA ALOAIA NEI LE FAAALIGA LONA 31 O LE TEUILA MO LENEI TAUSAGA
SOIFUA MA IA MANUIA
