Aso Faraile, 13 Aokuso 2021 i le 4:00pm
Lau Susuga i le Ta’ita’i o le Sauniga, Lau Susuga Rev. Moli Moli,
Minisitā o le Kapeneta,
Sui o le Faletupe o Atina’e a Asia,
Ta’ita’ifono o le Komiti Fa’atonu o le Pulega o Uafu ma Taulaga,
Fa’auluuluga o Matāgaluega ma Fa’alapotopotoga Tumā’oti a le Mālo,
Fa’auluuluga o Pisinisi, Le Paia ma le mamalu o le Au Valaaulia, Ali’i ma Tama’ita’i.
O le a ou le toe seutafilia le na’a, pe ou te toe tāilia tulafagā i paia sausaugatā o lenei aso. Auā o lea ua a’e i le ti ae ifo i le nonu ma fetaia’iga i le ala i Fuiono, ina ua ta’ita’i manuia mai lo outou soifua ma so matou ola i le alofa ma le agalelei o le Atua. O paia o Matā’utu Sa nei, paia tau’ave o Sinave ma Ulu-o-Moto’otua, Afio’aga o Tama Alo o Sina, Fuaifale o Salevalasi, afio le Matua ma Aiga, le Faletolu ma le Vainālepa ma ‘upu iā Tuisamau.
O paia o le tafatolu fefa’atauagai o le Faigāmālo i le Afio o le Sui Palemia ma le Kapeneta. O paia o Samoa mai le papa nai taū se’ia paia le papa na susū, o paia lava lea o Aiga ma Tama, o Tama ma Aiga, le usoga a Pule ma Tumua, Ituau ma Alataua, Aiga i leTai ma le Va’a o Fonoti.
Ua malama ulugalu ai le tatou fesilafa’iga, auā ua mae’a tu’ulaupua Paia o le Atua, pei ona sa fitāituga i ai le Susuga i le Fa’afeagaiga, o le latou fatuaiga tausi lea, auā se manuia o Samoa. Fa’afetai le fai tatalo, fa’afetai mo le manavaga paia ma talosaga e tomatauina ai lenei fa’amoemoe.
Ae o le agaga o le me’eme’e ma le fiafia, ina ua mafai ona tatou tapuvae e tasi mai i Matā’utu – Tai nei, mo le amatalia aloaia o lenei atina’e tele a lo tatou Mālo lea ua fesoasoani mai ai se tasi o pa’aga fa’avāomālo a Samoa, le Faletupe o Atina’e a Asia, e tauala mai i lona Ofisa ua fa’atuina i Apia i lo latou sao e ala mai i se fesoasoani e tusa ma le $62.26 miliona Amerika, o le sao o lo tatou Mālo e $12.77 miliona Amerika ma maua ai le tau atoa o lenei atina’e e tusa ma le $75.03 miliona Amerika.
O lenei atina’e o le a si’itia ai le lelei ma le saogālēmū o le fa’atinoina o galuega i luga o uafu i Apia aemaise o le si’itia o le gafatia ona tali atu i a’afiaga o le suiga o le tau ma fa’alavelave fa’alenatura. O le a toe fausiaina le taligalu o le uafu ma o lo’o aofia ai fo’i ma le fausiaina o se nofoaga mo le siakiina o pusa oloa e le Matāgaluega o Tiute e fa’aaogāina ai se masini fa’ata fou ma o le taimi muamua lea ua i ai se masini fa’apea mo galuega a le Ofisa o Tiute.
O se taimi talafeagai lenei e fausia ai atina’e fa’apenei e gafatia ona tali atu ai i a’afiaga ogaoga o le suiga o le tau ma o le agaga fa’agae’etia i lo tatou Mālo le galulue fa’apa’aga ai ma le Faletupe o le Atina’e o Asia i lenei atina’e aogā mo Samoa.
O vaega o lenei atina’e e aofia ai le;
• Toe fausiaina o le taligalu mo le puipuiga,
• Fausiaina o se va’a toso va’a fou mo le Pulega,
• Fa’atauina mai o se Fa’ata fou mo le siakiina o pusa oloa,
• Fa’aleleia o vaega e le’i fa’atāina o le uafu,
• Fa’aopoopoina o vaega fou e sulu i ai pusa oloa mālūlū,
• Molī fou mo le Uafu atoa,
• Afi fa’aleoleo fou mo luga o le uafu,
• Fale fou mo galuega fa’aleleia o masini o lo’o fa’aaogāina i luga o le uafu,
• Fale mo le Fa’ata fou a le Ofisa o Tiute,
• Fa’aleleia o le Fale Teu Oloa numera 2,
• Vaega e fa’atino ai asiasiga a le Ofisa o Tiute,
• Sa’ili’iliga mo le fa’aaogāina o malosi’aga fa’afouina i luga o le uafu.
O le Aso 29 Mati 2021 na sainia ai le konekarate mo le fausiaina o le taligalu ma isi galuega i luga o uafu ma le kamupanī o le China Harbour Engineering. O le Aso 9 o Ianuari 2021 na sainia ai le konekarate ma le kamupanī o le Cheoy Lee Shipyard lea o lo’o fausiaina le Va’a Tosova’a fou mo le Pulega. O le konekarate mo le asiasia ma le siakiina o galuega a le China Harbour na sainia ma le Beca International o le faufautua fa’apitoa i le Aso 8 Novema 2020 ae o le konekarate mo le fa’atinoga o se sa’ili’iliga mo le avea ai o le uafu i Apia ma uafu e fa’aaogāina malosi’aga fa’afouina na sainia ma le faufautua fa’apitoa o le Haskoning DHV mai Holani i le Aso 18 Novema 2020.
O le a amatalia aloaia le fausiaina o le taligalu ma isi galuega i luga o le uafu i le Aso 16 Aokuso 2021 fa’amoemoe e fa’amae’aina i le Aso 31 Mati 2024.
E tauala atu se leo o le Mālo i le Ofisa o le Faletupe o Atina’e o Asia i Apia, e momoli le fa’afetai tele a le Mālo o Samoa ona o le fa’aauau pea ona tu’u mai le fesoasoani e fa’atupeina ai atina’e mo’omia tele mo le atina’e o Samoa.
Fa’afetai atu i le Ta’ita’ifono ma le Komiti Fa’atonu le Pulega ma le Aufaigaluega o le Pulega o Uafu ma Taulaga mo tapenaga o lenei atina’e tāua. Fa’afetai atu i le Matāgaluega o Tupe ma le Matāgaluega o le Va-i-Fafo mo feso’ota’iga ma tapenaga uma ua maua ai nei fesoasoani tau tupe.
O le ‘upu a le atunu’u, a feso’ota’i le lau ma le lavelau, ua o’o i le āuāu, ona fa’atoa mafai lea ona tā’ua ua au le inailau. E fa’apenā lenei miti, o se fa’amoemoe sa taumate pe tua ma ni a, ae fa’afetai o lenei taeao ua tepa i ‘ula taga’i i ‘ula ma ua mauāluga ai lava le viiga o le Atua.
Ia fa’amanuia mai le Atua i lenei atina’e ina ia fesoasoani tele mo le atina’e manuia o Samoa i le lumana’i. Ou te fiafia e fa’ailoa atu, ua tatala aloaia nei le amatalia aloaia ai o lenei atina’e mo le si’itia o le saogālēmū, puipuiga malu ma le gafatia ona tali atu i a’afiaga o le tau ma fa’alavelave fa’alenatura o le Uafu Fa’avāmālo i Apia.
Soifua.
