Ua fa’amalo Samoa le onosa’i aemaise o le lava papale a’o tatou i ai i lenei vaitau o le tali atu i puipuiga o le KOVITI19 ua a’afia ai le lalolagi. Ua leva ona feagai i tatou ma tapenaga aemaise o puipuiga o le fa’ama’i ma e fa’afetai i le Atua o lo’o saogalemu pea si o tatou atunu’u.
O le a fa’atino le tuiga tele o le KOVITI-19 mo Samoa atoa mo i latou uma e lei faia tui puipui aemaise i latou e le’i fa’atinoina tui puipui lona lua. O le fa’amoemoe o lenei tuiga tele ina ia ausia le pasene fa’atulagaina ina ua mae’a uma tui puipui e lua mo le puipuiga lautele o le atunu’u mo i latou uma e agava’a ona fai tui puipui.
O le a fa’atinoina lenei tuiga tele i le Aso Faraile 19 Novema, 2021 e amata le 8:00taeao – 6:00afiafi. E tatalo atu le mamalu o le atunuu’u ina ia fa’ailoa mai aiga e le’i faia tui puipui muamua faapea ma le tui puipui lona lua, e ala i le nonoaina o se ie mūmū i luma o lou maota.
O le a galulue fa’atasi le aufaigaluega o le Soifua Maloloina ma Sui o Nu’u, Sui o le Malo ma Sui Tama’ita’i o Nu’u fa’atasi ai ma falema’i fa’aitumalo i le fa’agasologa o tui puipui i totonu o nu’u ma afioaga. E fautuaina uma tagata ua o’o i le aso pe ua pasi ma le aso fa’atulagaina o tui puipui lona lua, faapea ma i latou e lei faia tui puipui muamua ina ia nonofo ma fa’atali mai i outou maota ma laoa e fa’afaigofie ai le fa’atinoina o le galuega.
E talosaga atu i le mamalu o le atunu’u ina ia fa’aali lou pepa tui e fa’amautinoa ai ua mae’a ona fai lou tui puipui aemaise lava tagata o le a faigaluega i lea aso. Mo Pisinisi, Kamupani ma Ofisa faigaluega uma, ia mautinoa le fa’ao’o uma o lisi o le aufaigaluega ua mae’a uma tui puipui e lua i le Ofisa Tutotonu mo le Fa’afoeina o Fa’alavelave Matuia (NEOC) ae le’i o’o i le Aso Faraile 19 Novema, 2021. O le matafaioi a so’o se fale faigaluega le mautinoa ua mae’a ona fai uma tui puipui a lana aufaigaluega.
O le a fa’atinoina foi tui puipui o le KOVITI-19 i nofoaga fa’apitoa e pei ona taua i lalo e amata i le 8:00taeao – 6:00 afiafi.
1. Falema’i Fa’aitumalo e aofia ai le Falema’i i Tuasivi
2. Falea’oga Faapitoa a le MOH faafesagai ma le Fale Faamama Toto – Moto’otua
3. Fale Lanumoana o lo’o fa’atino ai Tui Puipui (fa’afesaga’i ma le Seb and Rene, Moto’otua)
4. Ofisa i Matagialalua
Fa’amolemole e taua tele le fai muamua o sina taumafataga ae lei faia le tui. Fa’ailoa i le tausi soifua o le a faia lou tui tala’aga uma e fa’atatau i lou soifua maloloina e aofia ai ni a’afiaga e masani ona alia’e pe a fai sou tui, fuālaau o togafitiga o lo’o fa’aauau le inuina ma nisi a’afiaga.
E ao pea ona silafia nisi nei o āuga e masani ona tupu i isi tagata pe a uma ona fai le tui puipui e pei o le tigā ma fula le vaega o le tino sa tui, vaivai ma gagase le tino, tigā le ulu ma fiva. O le to’atele o tagata ua uma ona fai tui e le i tutupu ai ni a’afiaga e pei ona taua i luga. E fautuaina le inu o fuālaau meatīgā, toaga e taumafa le vai ma sua o fuālaauaina suamalie ma ia lava le mālōlō. E le umi se taimi e maua ai le tagata fa’atoa uma ona fai le tui i ia āuga ae toe te’a.
Fa’amolemole e toe fa’aolooloma’au atu i le mamalu o le tatou atunu’u, ina ia faia tui puipui ma fa’aauau le fa’atinoina o isi puipuiga masani o le KOVITI-19. Ia tatou galulue fa’atasi e fa’atumauina pea le saogalēmū o si tatou atunu’u mai le KOVITI-19 ma ona a’afiaga.
Mo nisi fa’amatalaga, fa’afeso’ota’i le numera vili fua a le Matagaluega o le Soifua Maloloina 800-6440 po’o le Ofisa Tutotonu o lo’o Fa’afoeina Fa’alavelave Matuiā i le numera 997, pe asiasi ane i le MOH FB @healthsamoa po’o le GovernmentofSamoa @govtofsamoa
Puipui oe, puipui lou aiga, alofa ia Samoa!
Faafetai,
Leausa Tupa’i Samau T. Dr. Take Naseri
Faatonu Sili Aoao o le SOifua Maloloina
