(OFISA O SOOUPU); Ua faalauiloa faalaua’itele e le Mālō o Samoa faamatalaga ma taiala e patino i le faatinoina o tui puipui mo le Koviti-19, ua fuafuaina nei mo le atunuu atoa.
O nei Pepa o Faamatalaga na saunia e le Matagaluega o le Soifua Maloloina, e faailoa ai i le atunuu vala taua mo le tapenaga o lenei tuiga tele. O loo ta’ui lenei faamoemoe, i le naunauta’iga ia saogalēmū le atunuu atoa, ma ia puipuia mai i le mata’utia o le siama o le Koviti-19. O loo faamanino ai vaega togia o aiaiga faasoifua maloloina mo i latou o le a tui, faapea tu’utu’uga mo i latou o le a lē aofia i lenei tuiga.
O le vailaau o le AstraZeneca ua faamaonia mai mo Samoa, ma e lua tui puipui e ao ona faatino. O nei tui e lua e tatau ona faatino i totonu o le 8-12 vaiaso, ina ia atoatoa le malosi o le puipuiga o tagata uma o le a tui ai, mai le siama o le Koviti-19.
O loo faailoa atu foi i nei Pepa o Faamatalaga āuga e ono aafia ai nisi pe afai e māe’a ona tui, e pei o le fiva, tīgā o le ulu, tīgā pe fula le vaega o le tino na fai ai le tui puipui, vaivai ma lelava le tino, pe fa’ama’alili foi.
E tatalo atu le Komiti o Faalavelave Tutupu Faafuasei, e alofagia e le atunuu lenei galuega tele ua fuafua, ina ia mafai ona faatino e tusa ai ma le fuafuaga ua faataoto mo le manuia ma le saogalemu o si o tatou atunuu.
Mo nisi fa’amatalaga po o ni faafesili e faatatau i lenei fuafuaga, faamolemole valaau le numera vili fua: 8006440.
###
