Ia e fa’atalofa atu i le mamalu o le vasega o le au fa’asalalau ma tusitala aemaise le tapua’i maimoa mai a le mamalu o le atunu’u i le afio o ona tulaga fa’alupe.
Talofa, mālō le lagi e mamā ma le soifua manuia
Fa’afetai ua tatou aulia mai lenei aso ma le fa’aauauina o fa’asalalauga aemaise le mavae atu o fonotaga a le Kapeneta ma le fa’amauina fo’i o nisi o mea ua tula’i mai talu mai le feiloa’iga mai le vaiaso ua mavae.
FONOTAGA TETELE FA’AVĀOMĀLŌ
O taimi nei o le tausaga e masani ona usuia ai fono tetele a le lalolagi i Fa’alapotopotoga Fa’avāomālō, ma o se tasi o fonotaga tele o le fono lea a le Mālō Aufa’atasi lea ua tolu vaiaso talu ona mae’a, lea na usuia i Niu Ioka i Amerika.
Ona o tulaga i le taofia o femalaga’iga ua tele lava ona fa’atino nei fonotaga tele i luga o upega o fa’asalalauga e molimoli atu ai mau ma saunoaga a Mālō ta’itasi ma e fa’apenā fo’i le Mālō o Samoa. Sa auina atu le tatou fo’i feau i matā’upu sa lāgā i lea fo’i fonotaga tāua a Mālō Aufa’atasi.
Ae ua ala ona ou lāgā lea mataupu o fonotaga tetele fa’avāomālō ona o se tasi o fonotaga o lo’o fuafua i ai o le fonotaga lea o le Fa’alapotopotoga o matā’upu tau i le suiga o le tau, o lea e fa’amoemoe e usuia i Peretania i le masina o Novema.
E ‘ave lava le fa’amuamua a le tatou atunu’u fa’apea fo’i le Pasefika i matā’upu tau suiga o le tau. Sa i ai lava le fa’amoemoe e o’o atu i lea vaitau ua tau tatala mai avanoa tatou te femalagaa’i ai ae peita’i ua maitauina e le’o tu’u māmāina lava lu’itau o feagai ma atunu’u ona o o le fa’ama’i o le Koviti – 19 ma fa’apenā ona faigatā ai femalaga’iga ma ua fai ai se fa’ai’uga a le tatou Mālō, o le a lē auai atu le usugāfono a Samoa i le fonotaga lea i Peretania ona o fa’afitauli ia.
Ae o le a sa’ili auala e mafai ai ona fa’aauau pea le ‘ave o le lagolago a le tatou, Mālō i matā’upu ua tausagā o tatou tau’aveina mai i a’afiaga o Samoa ma le Pasefika i suiga o le tau ma ou te manatu o le a faia fo’i se taumafaiga e tu’ufa’atasia ai se finagalo a le Pasefika ma sa’ili auala e fa’apenā ona momoli atu ai le tatou mau.
Ae i ai lava se avanoa o tatou sui o i fafo ma ou te manatu o le tatou sui pito latalata o le tatou Amapasa lea i le Mālō Aufa’atasi o lo’o i ai nei i Niu Ioka, a maua se avanoa, ona maua ai lea o se tasi e mafai ona tau’aveina le usugāfono mo tatou.
Ae mo le tulaga masani mo le malaga atu o Ta’ita’i o le Mālō ma Minisitā o lo’o feagai ma matā’upu tau i suiga o le tau, o le a lē mafai ona fa’ataunu’u, ou te lē malaga i le tulaga o le Ta’ita’i o le Mālō ia ma le Minisitā fo’i o lo’o tau’aveina matā’upu tau i le si’osi’omaga e a’afia ai ma suiga o le tau.
O lea fa’ai’uga a le tatou Mālō o lo’o fa’aauauina ai pea le faiga fa’avae o lo’o taofia ai malaga ma o le tulaga lenā o le a o’o ai fo’i isi fono tetele o lo’o fa’apenā ona masani ona fuafua i le tau fa’ai’ui’u o le tausaga, e i ai fono i matā’upu tau i le soifua mālōlōina.
E tasi le fonotaga sa ou tā’ua i se tasi o tatou fa’asalalauga, o le World Export, o lo’o fai i Saudi Arabia ma o lo’o fa’apenā ona faia i ai le fa’ai’uga a le Kapeneta i le lua vaiaso talu ai, o le a fa’aauauina ai pea le usugāfono a Samoa i sui a le Mālō ma sui o Pisinisi Tumā’oti ona o se tapenaga ua leva ona tapena mai ua telē fo’i se tatou tino i tupe mo lenā fa’amoemoe, i le ma le isi matā’upu fa’apenā fo’i ona saunia e le Mālō o lo’o talimālō i lea fa’aāliga tele le tapenaga mo nofoaga ta’itasi o atunu’u uma o le a auai atu ai i lea fa’alauiloa pito tele i le lalolagi o le World Exports lea.
O le fa’ai’uga a le tatou Kapeneta e fa’amautū pea le fa’avae o le malaga a le Mālō vaganā ai o se matā’upu ogaoga ona fai lea i ai o se fa’ai’uga talafeagai.
FA’AMAUTŪINA LE ASO MO PALOTA LĀITI
Atonu o lea fo’i ua fofoga le atunu’u ua i ai se fa’ai’uga e tauala mai i le logoina e le Afioga i le Fofoga Fetalai ma le Ofisa o le Komesina o Faigā Palota mo tatou palota lāiti mo Itumālō e 7.
O lea ua fa’ata’atia ai le Aso 12 o Novema 2021 e fa’atino ai le tatou fa’amoemoe lea mo Itumālō e 7 ua avanoa o latou nofoa po’o tofi Faipule o le Palemene.
TAPENAGA FA’ALEANOFALE MO LE AUFAI-GALUEGA A LE MALO MA LE NOFOA-MATAGALUEGA
O se tasi o tulaga o lea ua aloalo atu i ai le tatou Mālō, atonu e mafai ona ou fa’amatalaina fa’apea aemaise o lea ua fa’atulaga le tatou tala o le tupe i tulaga masani ma ua fa’aauau galuega a le nofo- a – Matāgaluega, o lea ua liliu ai tau anofale i le vaega lea o le aufaigaluega a le Mālō i le Ofisa o le Komisi e Pulea le Aufaigaluega a le Mālō auā le nofo feagai ai ma le Fa’alapotopotoga o tagata faigaluega a le Mālō po’o le PSA fa’apea fo’i ma le tatou Matāgaluega o Auaunaga lautele (Ministry for Public Enterprises).
Ua ala ona ou tā’ua lenei tulaga ona o matā’upu tau anofale. O le fa’atulagaina o le fa’agaioiga o le tatou Mālō e fa’amoemoe tele lea, e le gata i tagata faigaluega ae fa’apea fo’i i tulafono o lo’o fa’ata’atitia ai le fa’agaioiga o le tatou Mālō.
Sa ou tautalagia fo’i i nisi o fa’asalalauga muamua atu e i ai le faiga fa’avae a le tatou Faigā Mālō Fou mo le Komisi e Pulea le Aufaigaluega a le Mālō e toe fia fa’afo’i i lona tulaga tuto’atasi sa amata mai ai ma o lea ua amata ona fa’agasolo le fa’atalanoaina ma fuafuaga pe fa’apefea ona fa’atino lenā fa’amoemoe.
E le’o po fo’i se lilo i le atunu’u i nisi fo’i o to’a tugā o lo’o alia’e mai i le finagalo a le aufaigaluega a le Mālō pei ona fa’atino mai i ni tusi pei na fa’ao’o mai, e le gata i lo’u Ofisa ae fa’apenā fo’i ona fa’agasolo atu i le Komisi ina ia mafai ona fa’agasolo ma sa’ili fo’i se auala e tagofia ai matā’upu i tulaga o ala o mea ma tulaga e aloaia.
Atonu o lea e pei ua manino tulaga o le Komisi e Pulea le Aufaigaluega a le Mālō ma le fa’amoemoe o lo’o tau tapena e fa’atulaga mai i sona tulaga tuto’atasi.
Ae mo le tatou Matāgaluega o le MPE (Ministry for Public Enterprises) mo Auaunaga Lautele, o lea lava o lo’o i ai se tulaga e le’o nofo lelei le fa’atulagaina o itutino ia o le Mālō aemaise le fa’agasologa o latou Pulega, ma le va nonofo ai o le Minisitā o loo nafa ma lea Matāgaluega ma Minisitā o lo’o nafa ma tulaga o Vaega Tumā’oti po’o tatou Sectors.
E fai ma fa’ata’ita’iga o le Sector lea o le Public Utilities, o auaunaga lautele pei ona i ai le Eletise, le Vai ma e i ai le Minisitā e masani ai i tulaga lava o le fa’ata’atia mai o tulafono, o le Minisitā lea mo galuega tetele ae peita’i ua i ai le tatou Matāgaluega lea ua masalo ua lua nei nofoa’iga talu ona fa’atulaga mai, o le Ministry for Public Enterprises o lo’o i ai fo’i lana ia Minisitā.
Ma ua maitauina e le’o ta’oto lelei tulaga o tatou tulafono i le fa’agaioiga o itutino ia o le Mālō ma o se vaaiga a le tatou Mālō i le pale mai o se tasi lea o vaega o itutino o le Mālō e tatau ona fa’ata’atia ma ia manino aemaise i le fa’atulagaina o Minisitā ma le latou fo’i matāfaioi.
O isi itu tau anofale i le tapenaga lava o Pulega aemaise o ni pulega e tuto’atasi sa talanoaina le tulaga o le fia fa’atuto’atasiina o le Ofisa o le Fono po’o le Ofisa o le Palemene ma o lea ua amata ona fa’atalatalanoa fo’i se auala e tapena ai lenā fa’amoemoe.
Ma o le tulaga moni o le tuto’atasi, o le pito e fai sina faigatā ona fa’atulaga ona o faiga masani a le Mālō o le fa’agaioiga lea o tupe po’o le a le auala e mautinoa ai le tuto’atasi e aofia ai ma tupe e fa’apenā ona fa’asoa mo lea vaega o le auaunaga a le tatou Mālō po’o le isi itu Pulega lea o le tatou Fono po’o le Palemene a le atunu’u.
O le isi Ofisa o lea fo’i ua amata ona fa’atalatalanoaina lona tulaga tuto’atasi aemaise fo’i lea ua amata ona tapena a tatou palota lāiti, o le Ofisa lea o Faigā Palota po’o le Komisi o Faigā Palota. Ma o le agaga lava ia o le fa’atuto’atasi ina ia lē a’afia i tulaga fa’apolokiki po’o Vaega Fa’a’upufai ae ia mafai ona tumā’oti ma tuto’atasi le Ofisa lea aemaise le fa’atinoga o lana auaunaga.
Atonu e sosolo mai ai lava i le tulaga o le tapenaga fa’aanofale ona ou te fa’aaogāina le ‘upu o le anofale e fa’asino i tagata faigaluega ma tulafono ma le fa’atulagaina o tatou Matāgaluega ona a saga tonu tulaga ia e faigofie ona fa’asolo galuega a le tatou Mālō. Ma ou te lagona ona o lea ua ta’atia le tatou Tala o le Tupe i ona tulaga masani ua fa’afaigofie ai ona se’e atu loa ni Minisitā i o latou matātā ma matāfaioi e fa’agasolo le latou galuega muamua ina ia fa’atulaga lelei latou Matāgaluega ma fa’amautinoa lelei a latou matāfaioi ma le fa’atinoga o latou auaunaga.
Ma o le fono a le Kapeneta i le asō, na fa’amaonia ai le vaegātupe o totoe sa amata mai i le Faigā Mālō talu ai i le tausaga ua mavae i le ‘Stimulus Package’ po’o le fesoasoani lea e tu’u atu i le aufaifa’ato’aga, sa i ai le vaega o lea fesoasoani sa amata, ae o lo’o totoe pea ma o lea ua tulaga mai le tatou Tala o le Tupe i se tulaga ua fa’agasolo i tulaga masani, o lea la ua mafai ai ona fa’aauau le polokalame lenā mo le aufaifa’ato’aga, e le gata mo le aufaifa’ato’aga a’o i latou sa faigaluega aemaise lava i latou ia sa i le vaega o Turisi lea ua leai ni latou galuega ae ua toe suia mai e faia ni a latou galuega tau fa’ato’aga ma le fa’aaogāina o laufanua, o mea uma ia sa fuafuaina ma amata mai i le la tausaga ma o lea ua fa’aauauina nei.
O le isi vaega na fa’atulaga ai le fesoasoani po’o le Stimulus Package e fa’aopoopo i le tatou Tala o le Tupe lenei ua amata ona fa’agasolo, o le 5 miliona talā o le Vaega o Turisi i faletalimālō ma tatou Beach Fales, tatou atina’e ia e tu matāfaga ma o lea na fa’atualga ai le 5 miliona talā, ma o lea ua uma ona fa’atonuina le Pulega o Turisi po’o tagata tafafao maimoa mai, ina ia amata loa ona fofola le fuafuaga ina ia mafai ona fa’asafua atu ai le fesoasoani lea o le 5 miliona talā.
O le Matāgaluega o Tinā ma Tama’ita’i, lea fo’i ua amata ona fa’ata’atia le latou polokalame e fa’agasolo ai le tali fuaitau i le lu’i lea mo le sauāina o tinā ma fanau ma ou te manatu o se polokalame tāua lea sa fa’alauiloa ma tatalaina aloaia e le Afioga i le Minisitā i le vaiaso ua tuana’i ma o se tasi lenei o polokalame o le a mafai ona fa’agasolo ona ua tatala mai le tatou Tala o le Tupe.
O se tasi fo’i o pepa ua pāsia i le tatou Kapeneta i le vaiaso le la ae fa’amaonia i le vaiaso nei, o se fuafuaga lea a le Matāgaluega o le MCIT, o le vaega lea e gafa ma fa’asalalauga ma tekonolosi ma o le fuafuaga lea ua i ai o lo’o fia faia se sa’ili’iliga o se survey ma iloa ai po’o fea tonu o lo’o ta’atia ai lea auaunaga i totonu o le Mālō i le nofo ā Matāgaluega ma e lē gata i le survey ina ia iloa po’o fa’afefea ona fa’atino ae fa’apenā fo’i i su’esu’ega ua tā’ua o le audit, e iloa ai le tulaga o le aogā o le fa’aaogāina o nei tekonolosi po’o o le lē aogā fo’i i totonu o Matāgaluega a le Mālō.
E ala ona ou aumaia ia fa’ai’uga a le Kapeneta ona o le atina’e fa’aonaponei o lo’o i ai le mau, o le ituāiga tekonolosi lea o le a fai ma fa’avae o le atina’e lautele ma i lenā tulaga e ao ona iloa lelei e le tatou Mālō po’o fea tonu o lo’o ta’atia ai lenā fa’avae, po’o malosi le fa’avae e mafai ona fa’aauau ai lenā mau o le auala lea e ti’eti’e ai i luga le atina’e ma le alu i luma o le tatou atunu’u e fa’amoemoe i luga o tekonolosi nei.
Ou te manatu o se galuega tāua tele lea ua pāsia e le Kapeneta e taulāmua mai ai le Matāgaluega i le Afioga ia Toelupe ma fa’apenā ona tau’aveina ai le su’esu’ega ia maua atoa mai ai se ata, po’o fea le mea o lo’o ta’atia ai pe a fua fo’i i luga o tupe ua fa’aalu e le tatou Mālō i ia tekonolosi.
E le gata mo galuega a Pulega ae mo auaunaga aemaise o tulaga tau i a’oa’oga ma le auaunaga o le soifua mālōlōina, ma isi lava itu o tau atia’e ua latou fa’aaogāina tekonolosi fou lenei e fa’avae ai ma momoli i ai le auaunaga o a latou pisinisi.
ASIASIGA A LE MĀLŌ I NISI O PISINISI I LE ATUNU’U
O le vaiaso fo’i lenei sa fa’atino ai se asiasiga sa taulāmua ai le tatou Matāgaluega o Pisinisi, Alāmanuia ma le Leipa (M.C.I.L.), taulāmua ai le Afioga i le Minisitā, le tōfā ia Leatinu’u ma lagolago atu fo’i i ai le Sui Palemia i lona tulaga o le Minisitā o Lāfoga ma a’u fo’i, fa’apea ma le Afioga i le Minisitā o Fa’ato’aga.
O le matou asiasiga la sa aga’i atu i le vaega o pisinisi o lo’o gaosia oloa ma atonu o se vaega tāua fo’i lea o le atina’e o le atunu’u aemaise o pisinisi o le vasega lea o le manufacturing sector ma e maitauina le tulaga o lo’o i ai nisi o tatou kamupanī tetele.
E fai ma fa’ata’ita’iga sa o’o le matou asiasiga i le pisinisi lea o le Fero. O le Fero e tai foliga mai o lo’o latou fa’atinoina nisi o galuega sa masani ona fai e le kamupanī lea o le Yazaki, e ui e tele nauā atu le Yazaki a’o le ituāiga pisinisi lea o lo’o fa’atino e le kamupanī lea.
Sa matou asiasi atu i le Skyline, o le kamupanī lea o lo’o nafa ma le gaosia o le tatou nonu juice, o lo’o nafa ma le vai taumafa ma o latou fo’i ia o lo’o gaosia le ‘ava lea o le ‘oli’oli. Na matou o’o fo’i i le tatou kamupanī sikaleti, British Tobacco, ma matou maitauina ai lenā fo’i kamupanī, ua leva i totonu o le atunu’u, o lo’o fa’amauina fo’i lo latou sao e tauala mai i le lāfoga, ae o se kamupanī fo’i o lo’o i ai ni aiaiga aemaise o le tulaga fa’ale-soifua mālōlōina. O lea ua logo mai ua i ai nisi o kamupanī sikaleti ua fa’amuta a latou laisene ona o le lē mafai ona latou fa’amalieina nisi o aiaiga fa’aletulafono e galulue ai.
O le asiasiga lea mo le vasega o pisinisi ae lē fa’apea o le atoaga fo’i lea o pisinisi a’o se asiasiaga tau amata ona o nisi nei o kamupanī o lo’o tetelē o latou sao i le Mālō e le gata i le fa’afaigaluegaina o tagata a’o le itu fo’i o tupe maua a le Mālō e tauala mai i latou lāfoga.
ASIASIGA A LE MINISITĀ O GALUEGA TETELE MA LANA PULEGA SAVAI’I
Atonu pe ua tou maua ua amata lava ona fa’agasolo galuega a Minisitā i o latou Matāgaluega e le gata i le tapu’e mai ona e fou le Faigā Mālō e tusa ai ma auaunaga o lo’o nafa ma lea Matāgaluega ma lea Matāgaluega, ma i le vaiaso lenei o lo’o toesea ai le Afioga i le Minisitā o Galuega Tetele ma lana Pulega mo le latou asiasiga i le motu tele i Salāfai.
ASO FA’APITOA MO LE SOIFUA MĀLŌLŌINA O LE MAFAUFAU
O le aso ananafi sa fa’apea na ma auai atu ai ma le Afioga o le Minisitā o le Soifua Mālōlōina i le fa’alauiloa lea o le aso fa’apitoa i le lalolagi mo le soifua mālōlōina o le mafaufau, po’o le ‘Mental Health Day’. Ma o ananafi sa fai ai le fa’alauiloa ma tatala aloaia ai lea aso.
A’o le aso o lo’o fa’apea ona fai ai se fa’aāliga e fa’ailoa ai auaunaga ‘ese’ese o lo’o i ai totonu o le atunu’u e fesoasoani ai ma lagolago i le fa’amoemoe o le soifua mālōlōina o le mafaufau.
O le tāua o le aso ananafi ma lenei fo’i aso o le maitauina lea o le galulue fa’apa’aga o le tatou Mālō e tauala atu i le Matāgaluega o le Soifua Mālōlōina ma ana pa’aga i Fa’alapotopotoga Tumā’oti, o Ekalesia, aemaise fo’i fa’alapotopotoga i totonu o nu’u o lo’o galulue fa’atasi e le gata i le fa’alauiloa a’o le momoli atu fo’i o le feau i le tatou atunu’u, e leai lava se ‘ese’esega o le gasegase o le tino ma le gasegase o le mafaufau.
E momoli atu ai lava le mau lenei, po’o le a lava le soifua mālōlōina o le tagata, ae a lē maua le soifua mālōlōina o lona mafaufau e le’o atoatoa lona soifua mālōlōina.
Ae peita’i e i ai lava se vaaiga e fa’atuatuana’i, e amata atu lava i le Mālō, i ituā’iga gasegase ia aemaise lava i lenei vaitau o lo’o feagai le atunu’u ma lu’itau o fa’ama’i e pei ona i ai le Koviti – 19, o lo’o manuia pea le tatou atunu’u ona e le’i o’o mai le fa’ama’i ia i tatou ae lea tatou te molimauina le tele o tagata ua fa’apenā ona maumau o latou soifua ona o lenei fa’ama’i. Ia ma le a’afia fo’i o le soifua mālōlōina o le mafaufau ona o nisi o aiaiga o lo’o fa’apenā ona pa puipui ai le sa’olotoga o tagata aemaise e faigofie tatou i Samoa e matala o tatou nofoaga ae a tatou maitauina i atunu’u i fafo, e i ai lava nofoaga, o le potu lava e tasi e fa’amautū i ai se aiga po’o se tagata e to’atasi, ona fa’apenā lea ona nonofo ai i taimi ona ua fa’atulafonoina le lē mafai ona o ‘ese ma fa’anofoesea tagata.
Ua tele ina alia’e mai gasegase nei o le mafaufau, ae mo tatou e i ai a’afiaga pe tau fa’afaigofie le tulaga e matala pea o tatou nofoaga ae i ai isi a’afiaga o le fa’ama’i o le lē maua o ni galuega ona ua vāea, o le fa’alēaogāina o le tele o nisi o atina’e ma maua ai lava le lu’itauina o le mafaufau o tagata ma afāina ai lona soifua mālōlōina fa’alemafaufau.
Tatou te manatua fo’i le fa’ama’i o le Misela ma le mea na tupu ma le a’afiaga fo’i o tagata ma o latou lagona aemaise le māliliu ai o fanau iti.
O itu uma lava ia ou te lagona ai e tatau lava ona tatou mafaufua fa’atasi ma tatou lagolago auā e i ai lava le vaaiga fo’i lea a fa’aletonu le mafaufau o le tagata ua tatou fa’apea, o le tagata lea o le vale, ae peita’i o le tulaga lava ia o le gasegase ma e pei fo’i o isi gasegase e i ai ona togafitiga e mafai ona fai ae o le fa’atupuina o le malamalama ma le iloa i lea fo’i ituā’iga auaunaga ma le galuega fa’afoma’i e mafai ona fa’afo’i mai ai le malosi o i latou ua a’afia o latou mafaufau, o le feau tāua lenā mo le aso o ananafi ma nei.
