Tusia: Tusiga Taofiga
O le fa’ai’uga o le vaiaso, na a’afia ai le atunu’u o Tonga i le mauga mu, lea na afua ai le Tsunami e pei ona tu’uina mai ai fautuaga a le Ofisa o Vaaitau i le atunu’u mo le nofo sauniuni.
O lea fa’alavelave na tula’i mai i lea atunu’u tuāoi o tatou i le Pasefika, na afua ai ni fa’aāliga o fa’asalalauga o fa’alavelave fa’alenatura mo le atunu’u atoa.
O le 7pm i le afiafi o le Aso To’ana’i 15 Ianuari 2022, na tu’uina mai ai le fautuaga mo Samoa aoao a’o le 10:30pm na tu’uina mai ai le fa’aāliga ina ia nofo sauniuni mo se Tsunami e ono a’afia Samoa.
Peita’i o le vaveao o le Aso Sa 16 Ianuari 2022, na toe tu’uina mai ai le fa’asalalauga aloā’ia mai le Ofisa o le Vaaitau, ua fa’alēaogāina ai le nofo sauniuni mo se Tsunami ae tumau pea fautuaga e pei ona tu’uina mai i le 7pm o le afiafi o le Aso To’ana’i.
O le vaveao o le Aso Gafua i le 5:30am na fa’ailoa mai ai le fa’alēaogāina o fautuaga mo se Tsunami.
Peita’i na fa’ailoa e le Ofisa Sili Lagolago o le Ofisa o le Vaaitau ia Afaese Luteru Tauvale, e tatau pea ona tatou nofo tapenapena pea, auā e le’o mautinoa e tatou pe toe pa le mauga mu i totonu o lenei fitu aso, talu ona mae’a lea fa’alavelave auā o lo’o vaaia pea le pusapusa a’e luga o le vevela ma asu mai lea nofoaga, ma e ono toe tula’i ai nisi galuega malolosi e ono a’afia ai Samoa ma isi atunu’u o le Pasefika i le lumana’i.
Saunoa manino Afaese, e ui ua tuana’i lea fa’alavelave, e fa’atumuaina pea fautuaga masani mo Samoa e tusa ai ma uiga loulouā o le tau, e aofia ai timuga mamafa, lologa ma le si’isi’i pea o le gataifale.
Sa i ai fo’i se popolega o le Ofisa o Vaaitau i lefulefu mai lea mauga mu e ono fa’atupulā’ia ai ni timuga mamafa mo Samoa peita’i o lea ua toe fa’ailoa mai e le Ofisa o Vaaitau e le’o a’afia Samoa i lea tulaga.
O lo’o fa’aauau pea ona mata’itu e le Ofisa o le Vaaitau uiga loulouā o le tau, ae o lo’o fa’aauau fo’i galuega a le Ofisa o Fa’alavelave Tutupu Fa’afuase’i ma Fa’alavelave Matuiā (N.E.O.C.) mo le taulogologo pea ma fa’amanatu i le atunu’u, ina ia ‘aua ‘aua ne’i fa’atamala mai le nofo tapenapena pea mo uiga loulouā o le tau o lo’o alia’e mai i lea taimi i lea taimi.
