HomeSamoaSAVALI 2 : ASO 19 IANUARI 2022 / Mataitū pea e le...

SAVALI 2 : ASO 19 IANUARI 2022 / Mataitū pea e le M.N.R.E. mauga mū o Samoa.

Share this:

Tusia: Taunuuga To’atasi

E le’o fa’atamala le Matāgaluega o Punaoa Fa’alenatura ma le Si’osi’omaga i le mata’itūina pea o mauga mū a Samoa.

I le feiloa’iga a le Savali ma le Ofisa Sili Lagolago o le Ofisa o le Va’ai Tau ia ‘Afa’ese Dr. Luteru Tauvale sa ia fa’aālia ai le fa’aauau pea ona mata’itū e le Matāgaluega mauga mū o le atunu’u.

O le fesiligia ai o le Ofisa Sili Lagolago i le tulaga lea, ona o le tulaga e pei ona aliali mai Tonga,  i le fa’ai’uga o le vaiaso na ua mavae, lea sa pa ai se mauga mū i se tasi o vaega o lea atunu’u, ma a’afia ai i le Tsunami, lea fo’i sa fautuaina ai Samoa, ona e latalata tele Samoa ia Tonga.

Na saunoa ‘Afa’ese e fa’apea, o le tulaga lea o lo’o i ai, o le mata’itū o tatou mauga mū, ona o Samoa le isi atunu’u o le Pasefika e tele ona mauga mū.

Peita’i, ua tele tausaga ua tuana’i e le’i i ai lava se tulaga o se mauga mū ua tula’i mai i totonu o le atunu’u.

E pau le vaega lea sa fa’amanino e ‘Afa’ese, o le tulaga lea e pei ona tu’uina atu ai fautuaga i le mamalu o le atunu’u i le taimi na pa ai le mauga mū i Tonga, ina ia silafia e le atunu’u atoa.

Na saunoa fo’i ‘Afa’ese e fa’apea, e fa’afaigatā ona iloa le tulaga o le vevela o mauga mū i Samoa nei, ona e le’o i ai ni masini e fua ai le vevela.

Peita’i, o le mauga mū i Tonga, o lea sa tagataga’i lava le to’atele o tagata i tulaga o lea mauga mū e pei ona i ai le asu e pusapusa mai le tumutumu o le mauga.

O le vaega fo’i lea e pei ona tu’uina mai ai fautuaga mo le atunu’u e pei ona saunoa ‘Afa’ese, ina ia logologopuiali’i pea le mamalu lautele o le atunu’u, auā le nofo silafia i tulaga e tatau ona sauni ma tapena i ai.

A’o le tulaga lava ia i mauga mū o le atunu’u, o lo’o mata’itū pea e le Matāgaluega ma e le’o i ai fo’i se tulaga fa’aletonu i le taimi nei.

E ui e le’o i ai ni masini mo le fuaina o vevela o mauga mū a le atunu’u, ae o lo’o mata’itū pea ma fa’atino le auaunaga a le Matāgaluega i le vaaia o ia vaega.

Share this:

Source

Stay Connected
255FansLike
473FollowersFollow
Must Read
Related News