Tusia: Tusiga Taofiga
Sui Fofoga Fetalai o le Palemene ia Auuapaau Mulipola Aloitafua
Ua folasia e le Sui Fofoga Fetalai o le Palemene ia Auuapaau Mulipola Aloitafua le lipoti mai le Komisi Fa’apalemene, mo le fa’avasegaina o aso fono mo lenei tausaga 2022 ma le amataga o le tausaga fou 2023.
I le saunoaga a le Sui Fofoga Fetalai na ia fa’amanino ai e fa’apea;
Mo Ianuari o le a amata usuia le ulua’i Fonotaga a le Palemene mo lenei tausaga fou i le Aso Lua 18 Ianuari 2022.
O Fepuari o le Aso 15, o Mati o lona Aso 29, o Me o lona Aso 31, o Iuni o le Aso 21, o Aokuso o lona Aso 23, o Oketopa o le Aso 18 ae fa’ai’uina ai Fonotaga a le Fono Aoao Faitulafono a Samoa mo lenei tausaga i le Aso 20 o Tesema 2022.
Ona fa’atoā toe tauaofia lea o le Palemene i le Aso 17 o Ianuari o lenā tausaga 2023.
Na fa’aluaina e le Afioga i le Palemia ia Fiame Naomi Mataafa le lafo ua folasia i le laulauafono ma lagolagoina e le Afioga ia La’auli Leuatea Polataivao.
Na fofogaina ma fa’atu le lafo e le Fofofga Fetalai ma pāsia ai loa e le mamalu o Sui Usufono o le Palemene e aunoa ma se tasi na au ‘ese le fa’agasologa o polokalame o Fonotaga a le Fono Aoao Faitulafono a Samoa.
O le taimi nei o lo’o fa’agasolo pea ona talanoaina i luga o le faitauga fa’alua le Tala Fa’atatau o le Fa’atatauina o Tupe 2021 – 2022, ma ua maua ai le avanoa o Sui Mamalu uma o le Palemene e folasia ai o latou taofi e tusa ai ma le tulaga lautele o le tamaoā’iga o Samoa fa’apea ai ma faiga fa’avae o tulaga tau tupe mo le manuia o Samoa ma ona tagata.
O lenei Fonotaga o lo’o fa’aauau pea i lenei vaiaso.
