HomeSamoaSAVALI 1: ASO 14 IANUARI 2022 / Manuia le taule’ale’a sa a’afia...

SAVALI 1: ASO 14 IANUARI 2022 / Manuia le taule’ale’a sa a’afia i le Koviti – 19

Share this:

Tusia: Tusiga Taofiga

I le mae’a ai o puipuiga, togafitiga ma su’ega (tests) mo le taule’ale’a sa fa’amauina le a’afia i siama o le Delta mai le Koviti – 19, e pei ona fa’anofoesea ai i nofoaga fa’apitoa ina ua o’o mai i Samoa, ua fa’ailoa mai ai le manuia atoatoa o lea ali’i ma ua te’a fo’i i tua i lona aiga.

O le fa’aāliga manino lea a le Fa’atonu Sili Aoao o le Matāgaluega o le Soifua Mālōlōina ia Leausa Samau Dr. Take Naseri, i le feiloa’iga ma Tusitala i le amataga o lenei vaiaso.

Saunoa Leausa, o lea taule’ale’a sa malaga mai i le malaga o le Aso Tofi, 09 Tesema 2021 mai Hawaii, ui ane i Los Angles i Amerika ma fa’ai’u ane ai Fiti a’o le’i taunu’u mai Samoa.

Mo le silafia o su’ega (tests) uma o le Koviti – 19 o lea ali’i sa faia i atunu’u sa aumau ai, na manuia uma ma e le’i a’afia fo’i i se siama ma ua mae’a fo’i ona faia uma ona tui puipui e lua o le Koviti – 19.

E o’o fo’i i le taimi sa taunu’u mai ai i le malae va’alele i Faleolo, na faia uma siaki o le pasese e to’a 134 e aofia ai ma lenei ali’i, ma iloa ai e leai lava se tasi o a’afia i se siama o lea fa’ama’i.

Peita’i i le tolu aso talu ona taunu’u mai, na faia ai le isi su’ega (test) ma iloa ai ua maua lenei ali’i i āuga o le siama, o iinā na vave ai ona a’apa le Mālō ma toe faia siaki fa’apitoa mo le isi vaega e to’a 26 na nonofo latalata ane i lea ali’i i luga o le va’alele peita’i e mae’a lelei le 21 aso sa fa’anofoesea ai ma isi aso fa’aopoopo na fa’aauau ai le fa’anofoesea o i latou nei, e le’o maua lava se tasi.

Saunoa le Fa’atonu Sili Aoao, e o’o mai i le Aso 03 Ianuari 2022, o lo’o malosi pea lea taule’ale’a e aunoa ma ni āuga tugā e vaaia ia te ia, ma i le 2 – 3 aso fa’aopoopo o lana fa’anofoesea na toe siaki ai ma iloa ai ua te’a ma ua leai fo’i se siama o toe a’afia ai o ia.

I le malaga mulimuli o lenā tausaga mai le Aso To’ana’i 18 Tesema 2021 mai Niu Sila, e to’a 277 le pasese ma o lo’o manuia uma i latou, e leai se isi o a’afia.

E fa’apenā fo’i i le malaga mai Brisbane Ausetalia i le Aso 07 o Tesema 2021, sa manuia uma fo’i le pasese.

O lo’o tumau pea le agaga fa’amalosi o le Mālō ma i latou o lo’o muāau i lenei galuega o le puipuiga o tatou tuāoi fa’avāomālō, ina ia mautinoa le leai o se siama se tasi e ono o’o i o tatou lau’ele’ele.

Fa’ailoa e Leausa, o lo’o vaaia pea le ‘ese’ese o vairasi o le Koviti – 19 o lo’o alia’e mai vaega ‘ese’ese o le lalolagi, ma e le’o mautinoa fo’i e Samoa i lenei vaitau, pe ono sasao fa’aafi lea fa’ama’i i Samoa pe a o’o mai, e a’afia gofie ai i latou e maua i gasegase pei o le suka, tino puta ma le toto mauāluga ma isi, ma o na mafaufauga tatou te le’o mautinoa i le taimi nei se’i vaganā ai ua a’afia si o tatou atunu’u i le fa’ama’i.

A’o le tatalo leoleoa pea a le Mālō i le Atua e pei ona ta’imua ai fo’i le vaiaso o Talosaga ma Anapogi, ina ia alofagia e le Matai Sili la tatou folauga i lenei vaitau, ina ia ‘aua ne’i afea e lenei fa’ama’i leaga ua ma’imau ai soifua o le to’atele o le lalolagi.

Share this:

Source

Stay Connected
255FansLike
473FollowersFollow
Must Read
Related News