HomeSamoaSAUNOAGA AUTU: AFIOGA LEATINUU WAYNE SO’OIALO, Minisita o Pisinisi, Alamanuia ma Leipa.

SAUNOAGA AUTU: AFIOGA LEATINUU WAYNE SO’OIALO, Minisita o Pisinisi, Alamanuia ma Leipa.

Share this:

Tatala Aloaia o le Fesoasoani KOVITI19 mo Vaega Maoti; ma le Fesoasoani mo Fa’alapotopotoga a Tagata Faigaluega (4 Fepuari 2022)

Lau Susuga le Fa’afeagaiga, Siaosi Matai’a,
Sui o Vaega Maoti,
Sui o Fa’alapotopotoga a Tagata Faigaluega,

Talofa Lava.

O lenei aso o se aso fiafia ma le taua tele mo i tatou ua auai mai e molimauina le tatala aloaia o
ni Polokalame Fesoasoani se lua (2) a le tatou Malō. O nei Fesoasoani ua fa’aigoaina:

(1) Fesoasoani mo Vaega Maoti ona o a’afiaga o le KOVITI19; ma le
(2) Fesoasoani mo Fa’alapotopotoga a Tagata Faigaluega.

E fia fai se fa’amatalaga muamua i le Fesoasoani mo Vaega Maoti ona o a’afiaga o le fa’ama’i o
le KOVITI19.

Ua alu nei le lua tausaga o a’afia le lalolagi atoa i a’afiaga tau tamaoaiga ona o le fa’ama’i o le
KOVITI19.

Mo Samoa o le fa’atulagaina o le tatou atunuu i luga o le fa’afanua o le laloagi, o se tasi lea o
lu’ita’u i vaega tau fefa’atauaiga ona o le tatou fa’alagolago i oloa ma auaunaga mai fafo fa’apea
ai ma le auina atu o a tatou oloa ma auaunaga i atunuu i fafo.

O le taimi nei ua i ai suiga i le fa’asologa o taimi ma aso mo va’a oloa ma ua tele ai ona tuai le
auina mai ma le auina atu o oloa e mana’omia e le tatou Vaega Maoti mo a latou fefa’atauaiga
mo a latou auaunaga iā tatou tagatanuu.

O se tasi o a’afiaga tugā o le tatou tamaoaiga o le fa’aitiitia lea o tupe maua mai le Alamanuia
tau Turisi ona o le tapunia o Tuaoi Faava-o-Malo ua le mafai ai ona toe Malaga mai turisi.

O lo’o tulimataia pea e le Malo nei a’afiaga o le fa’ama’i i le tatou Vaega Maoti e pei o ni isi o
pisinisi ua tapunia, o isi ua fa’amalolo a latou tagata faigaluega, ma o isi foi ua fa’aitiitia itula
ma aso faigaluega, ma isi a’afiaga o lo’o maitauina pea.

O le taua tele o auaunaga ma le sao a le Vaega Maoti i so o se tamaoaiga, o le ala lea ua tu’uina
ai i totonu o le Tala Faatatau o Tupe mo le Tausaga Faaletupe nei 2021/2022 se vaega tupe e $10
miliona talā e fesoasoani ai i le tatou Vaega Maoti.

O lenei fesoasoani o le a fesoasoani lea i le tatou Vaega Maoti i vaega o lo’o moomia e latou mo
galuega fa’atino a latou pisinisi. O pisinisi uma na lesitala ae le’i amata le fa’ama’i ma na latou
umia Laisene Pisinisi mo le tausaga 2020 ma le 2021 e agava’a i le Fesoasoani.

O le vaevaeina lenei o le Fesoasoani:

Ituaiga Pisinisi //Aofaiga o Pisinisi Lesitala i le 2020 //Aofaiga o Tupe o le a Fa’amatu’u atu i Pisinisi agavaa
Sole Traders/Tagata To’atasi // 5,170 $1,500 x 5,170 // = $7,755,000.00
Partnerships/Faiga paaga // 77 $1,500 x 77 // = $115,500.00
Companies/Kamupani // 1,116 $1,800 x 1116 // = $2,008,800.00

AOFAIGA // 6,363 // $9,879,300.00

 Pisinisi Umia e le tagata e toatasi (sole trader) ma Faiga Pa’aga (Partnership): E $1,500
mo le Laisene Pisinisi. O le Sole Trader ma Partnership e ova atu ma le 4 laisene pisinisi,
e na o le 4 pisinisi e maua le fesoasoani.

 Kamupani: E $1,800 mo le Laisene Pisinisi. O le kamupani e ova atu ma le 5 laisene
pisinisi, e na o le 5 pisinisi e maua le fesoasoani.

O Pepa Talosaga o le a mafai ona maua mai i le Matagaluega o Pisinisi, Alamanuia ma Leipa,
ma e mafai foi ona maua i luga o le upega tafa’ilagi a le Matagaluega. E fautuaina foi tatou
pisinisi agavaa ina ia tu’uina uma mai fa’amatalaga ma fa’amaumauga manaomia ina ia vave ai
foi le iloiloina o talosaga.

O le Matagaluega o Pisinisi, Alamanuia ma Leipa foi o le a puleaina le faatino’ina o lenei
Fesoasoani ma o le a galulue fa’atasi ai ma le Matagaluega o Tupe, ma le Matagaluega o Tupe
Maua e iloilo talosaga ma fa’amatu’u atu vaega tupe i pisinisi agava’a ta’itasi.

Ina ia mautinoa le fa’aaoga tatau o lenei Fesoasoani, o pisinisi agavaa uma e talia a latou
talosaga e manaomia le toe tuuina mai o Lipoti e faailoa mai ai vaega na fa’aaogaina ai nei
vaega tupe. Ua i ai foi le mamanu ua tapenaina mo le tuuina mai o nei Lipoti ma o lo’o maua foi
i le Matagaluega o Pisinisi, Alamanuia ma Leipa.

E momoli atu ai le fa’afetai i le Komiti Fa’afoe na fa’atuina e fa’atalanoa le Fa’avaa ma Faiga
Faavae mo le faasoaina o lenei Fesoasoani.

Vaega Lua: Fesoasoani mo Fa’alapotopotoga a Tagata Faigaluega
O se tasi o vaai mamao a le Malo, o le unaia lea o le fa’aailoaina o Fa’alapotopotoga o Tagata
Faigaluega i vaega aloaia uma o le atinae tau tamaoaiga, ua auala atu ai lenei fesoasoani a le Malo i
le Matagaluega o Pisinisi, Alamanuia ma Leipa.

O lenei Fesoasoani o le a avea ma se vaega tumau faa-le-tausaga mo Fa’alapotopotoga o Tagata
Faigaluega o lo’o avea ma sui auai i le Fono Aoao Faatafatolu a Samoa i le taimi nei

O le fa’aaogaina o le auala o faatalatalanoaga ma fetufaaiga faatafatolu, o sui o le Malo, o e ana
galuega, ma tagata faigaluega ua mafai ona lagona o latou leo i le atina’eina o mataupu tau leipa ma
galuega ina ia mautinoa ai le maua uma e sui auai o le avanoa e fetufa’ai ai aua le atina’eina o le
tamaoaiga.

O sui auai o lenei fono aoao ua fa’aaogāina ina ia mautinoa o mataupu ogaoga mo le fa’atauaina o
tagata faigaluega o le a fa’ailoaina i ituaiga galuega uma e aofia ai Vaega Maoti ma le Malo, ma e
faapitoa lea i galuega faatausima’i ma galuega i le gataifale.

O lenei fesoasoani e $20,000 Tala le aofai ma o le a vaevaeina ta’i $5,000 Tala i Fa’alapotopotoga a
Tagata Faigaluega nei e to’afa (4):

Fono Aoao o Tagata Faigaluega i Samoa (Samoa Workers Congress)

Fa’alapotopotoga o le Au Tausi Soifua a Samoa

Fa’alapotopotoga o Tagata Faigaluega a le Malo

Fa’alapotopotoga oTagata Faigaluega i Luga o Va’a

O lenei Fesoasoani e mo galuega fa’aofisa ma isi polokalame tau atina’e a nei Fa’alapotopotoga. O
le atoaga o lenei faamoemoe ina ia mafai ai e nei fa’alapotopotoga ona siitia lo latou auai mo le
fa’aailoaina o a latou sini autu i vaega eseese e ala mai ai fesoasoani.

E i ai le talitonuga e umi se taimi e fa’atino ai ni taumafaiga e toe tau fa’afoi ai le tamaoaiga i le
tulaga lelei tau atina’e sa i ai ae le’i tupu mai lenei fa’ama’i.

O lea e tāua tele ai le tatou galulue fa’atasi aua le agai i luma o a tatou galuega ma atina’e
fa’atino.

E momoli atu ai fa’amanuiaga mo outou uma, ma ia puipui mai pea lo tatou Tapaau o i le Lagi ia
Samoa i lenei vaitaimi faigata.

Ia manuia le tatou fa’amoemoe.

SOIFUA

Share this:

Source

Stay Connected
251FansLike
454FollowersFollow
Must Read
Related News