(ASO TOFI 28 OKETOPA)
UPU TOMUA
Lau Susuga i le Taitai o le Sauniga, lau Susuga i le Tausi Matagaluega. Manatu o lea ua ua maea ona utu le uila o matagi, ma ua mapu i falematū le faiva o Pulelaā. Ua lele malie le tia, ma ua mapu i le tuasivi faiva o tama seuseu o le talalelei aua le Atua ma lana faatofalaiga e pei ona saunoa le taitai o le sauniga e faanōnō manū aua manuia o le tatou faamoemoe i lenei aso.
O lagona tonu ia o le faafetai ma le faamanū aūa ana lē ‘au i tatou ma le Atua, semanu tatou te galulue fua ma e lē tini lau o le faamoemoe. O le matou tatalo i lau Susuga tausi matagaluega, ia tumu pea lau utu ma ututuliipae manuia o le Atua aua lou faafalelemalu i Afioaga nei o Aiga ma Salafai ona o le Atua ma lana galuega.
PAIA
Ua malu maunu tia seu i le afio mai Paia o le Tatou Nuu
– Afio mai o Aiga
– Afifio Tufuga ma Masoe ma le Falefā o le Usoalii
– Maliu mai Salafai faiga ma ituala e lua o le falefia ma le Siu o le Fanua. Le vagana Mua ma Fao ma oe na le Pule a Vaisigano.
Lea foi ua afifio atu paia faalemalo, Afio atu le Afioga i le Minisita lagolago. Afifio atu le Afioga Taitaifono ma le sui mamalu i le Komiti faafoe, faauluuluga o le Pulega LTA ma le mamalu o loo tautuaina le tatou malo.
TALA O LE GALUEGA.
O lenei galuega na amataina i le masina o Me 2021, ae faamae’aina ia Setema 2021. Sa faatauofoina ma manumalo ai le konekarate a le Handymen Contractors Co. Ltd. i le tau e $651,295.31. O galuega faia sa i totonu o lenei Aofaiga tupe sa aofia ai,
⮚ Le toe faaleleia ma valitaina o le 1.5 kilomita o le auala i le 4.5 mita le lautele.
FOLASAGA LAUTELE
O auala ua tatalaina i Salafa i nei, o le isi lea o pine faamau o Faiga faavae o lo tatou Malo mo ni alamanuia tutusa mo tagata uma i afioaga uma o si o tatou atunuu. O isi ia o atinae a le Malo ua aoga tele mo le soifua maloloina o tagata, soifuafiafia, e toleni ai ma faapa’u ai le suka ma le toto maualuga, maua le soifua maloloina ma vave ai ona si’itia a tatou atinae tau tamaoaiga.
E le gata i lea, e le ta’ufa’atauva’aina e le Malo le sao taua o Taitai o Afio’aga ma le pule faamalumalu a Alii ma Faipule I taumafaiga mo le atina’e ina o si o tatou Atunuu mo nei ma a taeao. E momoli atu le faafetai i le Kamupani a le Handymen Contractors Co. Ltd. mo lenei galuega lelei ona faatinoina, aemaise le Pulega o Fela’uaiga i le Lau’eleele poo le LTA mo le fuafuaina ma le va’aia faalelei o le faatinoina o lenei galuega.
UPU FAAI’U
Faamoemoe pea i le mana o le Alii e tali mai ia tatou talosaga mo fuafuaga uma, ma atinae e faaaoga ai lenei auala. Ia solo ai le Lagi matafi Paia faalagi o lenei aso, ae ou maloloina .
Manuia lenei aso i le alofa o le Atua.
Soifua
