HomeSamoaSAUNOAGA A LE MINISITA O TUPE, AFIOGA MULIPOLA ANAROSA ‘ALE MOLIO’O

SAUNOAGA A LE MINISITA O TUPE, AFIOGA MULIPOLA ANAROSA ‘ALE MOLIO’O

Share this:

Sainia o le $2 Miliona Fesoasoani a le Mālo mo le Fausiaina o Fale mo e Lima Vaivai ma le Lē Tagolima. ; (Aso Faraile 4 Fepuari 2022)

E faatalofa ma faafeiloai atu i lau Afioga ile Sui Palemia ma Minisita o le Kapeneta.

E faatalofa atu foi i Faalapotopotoga o le ADRA Samoa ma le Caritas Samoa ua tatou faatasi i lenei itula o le aso faapea Faauluuluga ma sui o Matagaluega.

O le agaga fiafia e le muta ona ole fa’atasiga ma le fa’amoemoe o le asō, auā le sainia aloa’ia ole faigapa’aga a le Mālo ma Faalapotopotoga o le ADRA Samoa ma le Caritas Samoa.

E lagolagoina e le faigamālo lenei polokalame, ona e ō gatusa ma le Taiala ma Fuafuaga a le Mālo aemaise ile atinaeina o tagata, nuu ma afioaga e ala ile fesoasoani ile fautuaina o aiga ma le fauina o fale mo nei aiga ua faamaonia e vaivai o latou tamaoaiga ma lē tagolima.

O leisi itu taua o le fesoasoani o le taumafai lea e ave le fesoasoani ona o lenei vaitaimi ua aafia tele le atunuu ma o tatou tagata ile koviti-19 ae le gata i lea o lesona foi sa maitauina e le Malo ile vaitaimi ole misela ma le taua tele ole tumama, ma le iai o vaega moomia aua le tausisia pea ole faamamaina o tatou laoa ina ia mafai ai pea ona tausisia taiala o loo faamalosia foi e le tatou Matagaluega ole Soifua Maloloina e tetee atu ai ile pisi ole Koviti-19 aemaise lava i faleui ma faleletaua (sei tulou).

O lenei polokalame, o se polokalame faaauau ma o le a faatinoina e le ADRA Samoa. Ma o le taimi muamua lenei ua ofi mai ai ma le Caritas Samoa ma o le a galulue faatasi ai ma le Ofisa o Tupe ma isi Matagaluega a le Malo talafeagai ile faatinoina o lenei fesoasoani laveai. E $2 miliona talā ua fa’aagaga i le tausaga fa’aletupe 2021/2022 auā lenei polokalame. O loo iai foi le faamoemoe e faaauau ma mataituina ma iloiloina pea lenei faamoemoe ile agai i luma.

O lenei fesoasoani o loo auala atu ile ADRA ma le Caritas o loo agai lea ile faatinoina o vaega nei:

1. Fausiaina o fale mautu ma saogalemu e nonofo ai aiga ua faamaonia o loo iai o latou manaoga e tusa ai ma faiga faavae ua faátaatitia e le Malo faapea faalapotopotoga faamanuiaina,

2. Faaleleia tulaga tau soifua maloloina e ala ile fausia lelei o nofoaga tumama (sanitation facilities) aemaise ia mafai e aiga ona faatino tulaga e tetee atu ai i le Koviti-19 ma isi faamai e pei foi ole misela ma isi;

3. Tu’uina atu tane vai i aiga o lo’o manaomia ma leí oo atu iai le suavai aua gasesega, tumama ma le ola soifua maloloina i aso uma ina ia fesoasoani foi ile puipuiga mai ile mau faámai ma le Koviti ma faaitiitia le tulaga lamatia ona o suiga ole tau ma fa’alavelave fa’alenatura o loo aafia ai tele si o tatou atunuu.

E talitonu o le a aoga tele lenei fesoasoani e le gata mo tagatanuu o Samoa ae faapea foi ile atinaeina ma le faaleleia pea o tatou faalapotopotoga e pei ole ADRA ma le Caritas Samoa.

E fa’afetaia ai fo’i le galuega fa’atino a le ADRA sa faatinoina mai i tausaga ua mavae ma le vaai mamao a i latou foi o loo taulamua ile avea lea ole fesoasoani tau fale mo tatou tagatanuu.

Faafetai atu foi ile Caritas Samoa e talitonu ole a tele foi le fesoasoani aemaise o le lagolagosua lea ia vave ona faatino le tatou galuega fai faatasi.

Ia faamanuia atu le Atua o manuia i o outou faiva ile faatinoina o lenei polokalame taua a le tatou Malo ma ia maua foi e i latou o le a agavaa i lea fesoasoani le taua ole galuega o loo taumafai atu iai lo tatou Malo aemaise ia avea ma faamalosiau e galulue ma atinae o tatou aiga, nuu, itumalo aemaise le atunuu.

Fa’afetai

Share this:

Source

Stay Connected
255FansLike
473FollowersFollow
Must Read
Related News