Tusa ai ma faamaumauga a le Ofisa o le Vaaitau i le aso, o lo o iai pea taaviliga o peau mamafa o le ea i luga a’e o Samoa ua afua ai ona tumau pea le atunuu i le mamafa o timuga ma le susu o le ea. O ia uiga louloua o le tau ua aafia ai le atunuu ua mafua ai le tuuina atu o lapataiga o timuga mamafa ma lologa.
E fautuaina pea le mamalu o le atunuu ina ia o tatou galulue faatasi e aputiputi nai fanau iti, o matua tausi, ma i latou e iai manaoga faapitoa.
E fautuaina foi lo outou mamalu ina ia aloalo ese pea ma vaitafe ma ia mataalia i le mataituina o suiga ogaoga e tulai mai. E faamanatu atu foi le tausia pea o le soifua maloloina lautele ma le faapunaina o le suavai a o lei taumafaina.
Ma i le aoauli nei, e fa (4) nofoaga ua tapenaina mo le to’a iai o aiga pe afai e faaauau pea le tulaga lamatia o iai nei timuga mamafa ma tupu ai i ni lologa ma ua le saogalemu nofoaga o loo nonofo ai.
O nei nofoaga o loo i le lotoa;
- Maota o le ADRA i le Ekalesia Aso Fitu i Lalovaea
- SSFA Gym numera lua i Tuanaimato
- NUS Compound i Vaivase
- SSFA Multipurpose Gym i Tuanaimato
O loo faaauau le galuega a le tatou Komiti e ala i le Pulega o Felauaiga i le Laueleele, o le Pulega o Tineimu ma le Matagaluega o Leoleo, ina ia mautinoa le malu puipuia ma le saogalemu o le atunuu mai i tulaga louloa o le tau. Mo ni faalavelave faafuasei, faafesootai mai le 997( NEOC), le 911 (SFESA) poo le 22222 (Ofisa o Leoleo).
Maea.
