Apia, 1 Mati 2021 – A’o tapena ai le mamalu o le atunu’u mo le faiga palota ia Aperila 2021, ua faapea ona alia’e mai ai foi ni popolega e ono aafia ai le sa’olotoga o le tagata e fa’atinoina lana palota e tusa ai ma lana lava ia filifiliga.
O nei popolega e aofia ai le faatinoina lea e pulega a Ali’i ma Faipule i nisi o Afioaga ni tulaga le talafeagai, faiga faailogatagata, ma faiga taufa’amatau e ono a’afia ai le sa’olotoga a le tagata e fa’atinoina ai lana filifiliga tatau ile taimi o faiga palota.
O lo’o maua fo’i fa’amatalaga o lo’o iai ni Komiti a sui tauva o lo’o taumafai e faatino ni auala fa’aalatua e fa’atosina ai tagata e palota mo a latou sui tauva. E ono tēle se a’afiaga o le sa’olotoga a le tagata e filifili ai le sui o lo’o mana’o iai i nei tulaga lē talafeagai. E tatau ia’i latou o lo’o mau tofiga e aofia ai totonu o nu’u ma Afioaga ona taulamua ile puipuia o aia tatau o tagata ile taimi o faiga palota.
O se avanoa lea e toe fa’amanatu ai le aia tatau a le tagatanu’u o Samoa le auai ma faasoa ona manatu i le fa’atinoina o galuega a le malo e aofia ai fo’i lana aia tatau e fa’atinoina ai lana palota po’o le avea foi o ia ma sui tauva i le taimi o faiga palota pea fai e agava’a.
O nei aia tatau o fa’atumutumuga nei o faiga malo fa’atemokarasi lelei o lo’o faavaeina lea i filifiliga tatau a tagata lautele. O faiga palota e tatau ona fa’atinoina ma le fa’amaoni ina ia mautinoa le puipuia ma le fa’atauaina o aia tatau o tagata uma.
O le Veaga 21 ole Maliega a Malo Aufa’atasi ile puipuiaga o aia tatau o tagata lautele (Universal Declaration of Human Rights) o lo’o maioio ma manino mai ai aia tatau a tagatanu’u uma e auai ma fa’asoa o latou manatu i faigamalo o a latou lava atunuu e ala i le avea ma sui o le Palemene po’o le palota lea mo se sui ua filifili e latou e agava’a e mafai ona fa’aleoina ona manatu i totonu o faigamalo.
O lenei foi aia tatau o lo’o toe fa’amatala ma fa’amanino i lalo o le Vaega 1 o le Feagaiga Fa’avaomalo i le va ma isi ma aia tatau tau upufai o Malo (International Covenant on Civil and Political Rights) lea na sainia aloaia e Samoa i le tausaga e 2008.
O faiga palota e faia ma le sa’o ma le tonu e fa’amausalī ai fo’i nisi o aia tatau ma sa’olotoga a tagata lautele o lo’o ta aofa’i i lalo o le Vaega 19 o le Feagaiga Fa’avaomalo I le va ma isi ma aia tatau tau upufai o Malo pei o le sa’olotoga e fa’aali ma faaleo ai manatu (freedom of opinion and expression) faapea foi le saolotoga e maua ai faamatalaga (freedom of information). O lo’o aiaia fo’i nei saolotoga i lalo o le Tulafono Fa’avae a Samoa ina ia faatumauina faiga faatemokarasi ma pulega lelei i totonu o Samoa.
O le faia o uiga fa’aalatua ile vaitaimi o faiga palota, faia o ni faiga sese e fa’atosina ai tagata, ma le faia lea o ni fa’asalalauga e ta’uleaga ai se sui tauva e matua’i fa’asaina i lalo o le Vaega 8 ma le Vaega 9 o le Tulafono o Faiga Palota 1963.
Afai e lē maumaututu puipuiga o nei tulaga e ono a’afia ai le sologa lelei o faiga palota e saoloto ma amiotonu.
E taua tele i pulega a Ali’i ma Faipule e pei ona atagia i lalo o le tulafono I le faamautinoaina lea o le sologa lelei o mea fai I totonu o Afioaga. O Samoa o le atunu’u tofi, o pulega faatemokarasi o lo’o faavae ai. E tatau la ona malu puipuia aia tatau o tagata ta’ito’atasi e faatinoina ai a latou palota ma le sa’oloto
O se tu’ualalo ma se fa’amanatu a le Ofisa i sui tauva ma a latou Komiti, aemaise le Fono mamalu a Ali’i ma Faipule i totonu o Afioaga taitasi e galulue fa’atasi ina ia faaaloalogia ma puipuia aia tatau o tagata lautele e fa’atinoina ai a latou palota e tusa ai ma tulafono a Samoa aemaise le faatauaina o feagaiga faavaomalo ua mae’a ona saini lima iai ta’ita’i o lo tatou atunu’u.
