HomeSamoaMalelega a le Ao o le Malo, Tuimalealiifano Vaaletoa Sualauvi II TAPUNIA...

Malelega a le Ao o le Malo, Tuimalealiifano Vaaletoa Sualauvi II TAPUNIA ALOAIA O LE PAEAIGA LONA XVI O LE PALEMENE 2016 – 2021.

Share this:

Ou te faatulou atu i paia agi nunui tetele, ma mamalu e agi laufofola o Samoa.

I le susu o Lau Susuga i le Taitai o le Sauniga, lau Susuga i le Faafeagaiga Rev Uta Muaulu; 

Lau Afioga i le Sui o le Fono a Sui Tofia ma lou Faletua;

Lau Afioga i le Alii Palemia ma Minisita o le Kapeneta, faapea Minisita Lagolago;

Lau Afioga i le Fofoga Fetalai ma Sui Mamalu o le Fono Aoao Faitulafono,

Lau Afioga i le Sui Faamasino Sili ma le Vasega o Alii ma Tamaitai o le Faamasinoga;

Members of the Diplomatic Corps;

Faauluuluga o Matagaluega ma Faalapotopotoga a le Malo, ma Pisinisi Tumaoti;

Le paia o Samoa o loo faafofoga ma maimoa tapuai mai i soo se tafa o le atunuu ma le lalolagi.

O le paia lava lea aua Aiga ma Tama, o Tama foi ma Aiga, Tumua ma Pule, Ituau ma Alataua, Aiga i le Tai ma le Vaa o Fonoti.

E faatulou atu foi i le tapuaiga a Tutuila ma Manu’a, i le afio o le Alii Kovana ma le Faigamalo, ae tainane le Pulega Malo i le Pulega Faatonu, le Faamasinoga, ma Maota e lua o le Palemene o Amerika Samoa. O le paia lava lea aua Sua ma le Vaifanua, Fofo ma Aitulagi, Saole ma le Launiu Saelua. Afifio Faatuiolemotu, Le laau na amotasi, Alalatai Tootoo o le Faleula, ma upu i le Manu’atele.

A e ua atoatoa li’o o le masina, i le malamalama o le talalelei i a Iesu Keriso na sulugia ai Samoa i le Upumana a le Atua, ma goga ai le pogisa. O lo o folafola e ana auauna i soo se fata faitaulaga i le atunuu.

Ua mapu nei i le tuasivi le faiva o manusina, ma ua utupupū foi le vai

o le tautai-alii ina ua sili’ofe le seuga a  tautai mātapalapala, aua ua a’e i manū le faatamasoali’iga a le Paeaiga “Lona XVI” o le Palemene o Samoa.

O la le fai Salamo:

“Ieova e, ua e faamalie mai ia i matou i lou alofa, ma lou faamaoni e autupulagā, ua e faauuina i matou i le suau’u, ina ia o matou alalaga fiafia ma le olioli i ou luma i aso uma o lo matou ola”

O le lagona lena i lenei taeao, o le faafetai tatou te sulaina ai le alofa ma le agalelei o Le Atua o le Tapaau Tasi o Samoa.  E ui lava ina sa lutia i puava le folauga a le Palemene ona o le vala’au paia a le Atua, i afioga i Alii Faipule, le Afioga Vaafusuaga Toleafoa Ken Poutoa, ma le Tofa Pa’u Sefo Taumata Pa’u, a o le pule tunoa a lo tatou Atua, lea ua o tatou toai taunuu ai i le toe aso o lenei paeaiga i lagimālie, ma le soifua laulelei. Tau ia ina ia fa’amaise le Agaga o Le Atua i Faletua, o nofo-a-alo ma aiga, o Itumalo, aemaise lenei Palemene.

Lau Afioga i le Fofoga Fetalai, lau Afioga i le Alii Palemia ma le Kapeneta, faapea Sui mamalu uma o le Palemene, ua faamalo le pale, faafetai le faatoatoa, ua faamalo le soa. Faafetai i le faafoefoeina o le sa o Samoa i lenei lima tausaga o le a faaiuina. Na outou sautia, laina, ma pogia i le ala, e saili mafua lelei, ma filifili tupetoa upufai o le Palemene, aua se ai o le tapuaiga a Samoa. O le upu moni, o lo outou gapatia ma le fitaituga ina ia manuia si o tatou atunuu, e le o auaoa i le silafaga paia a le Atua. O ia na te tauia faaaliali galuega lelei uma.

E avea lenei laolao taua e faafetaia ai le faasifoga ma le nonoga manu  a le aufaigaluega totofi a le Atua, aemaise le loaloa o si o tatou atunuu, a o alofaiva le Palemene i ana tauaofiaga. A lea ua tini pao le uto, ma ua tau le ai. Ua lē gape le afa o le vai na tuutuu aao o le tupu, a ua ae manuia faiva sa feagai ma le Palemene i le Paeaiga Lona 16 lenei. E pine ai le mau a Samoa, o faiva e tapuaia, o faiva na e manuia. Malo le faitatalo.

A toe tomanatu i galuega a le Palemene ua ausia i lenei paeaiga, e maualuga i le mafaufau le tofā na a’e, ua faamautuina ai lo tatou talitonuga maumaua’i i le Atua Silisiliese, ma ua tamau i totonu o le Faavae o le Malo Tutoatasi o Samoa. O se matatia iloga, ae sili ona leotele i luma o le nofoalii paia o le Atua. Ua o tatou tautino ai ma loto faatuatua moni, o Samoa o le atunuu kerisiano, e faavae i Le Atua le Tamā, le Alo, ma le Agaga Paia, e tusa ma le Teuteuga o le Faavae i le 2017.

 Faafetai tele i le tulaga faaeaina ua ausia e tina ma tamaitai o le atunuu e ala i lo latou sao taua i le Palemene. Sa faamauina i le malelega mai le Nofoa i le tatalaina aloaia o le Paeaiga lenei ia Mati 2016, “e tulaga ese le Paeaiga Lona 16 lenei, ona o le maoa’e o le pasene o Sui Usufono fou ua filifilia. E le gata i lea, a o le siitia o le aofai o Sui Usufono Tamaitai sa fa’amanuiaina” i le faiga filifiliga a le atunuu.

O se taeao fou lea i le tala faasolopito o le Palemene o Samoa, aua o le uluai taimi lenei ua ausia ai le toalima o le aofai o Faipule Tamaitai i totonu o le Palemene, ina ua faamamaluina i le Paeaiga lenei, le Teuteuga o le Faavae mo aiaiga faapitoa ma tapulaa, e faatumau ai le sao o Sui Usufono Tamaitai i totonu o le Palemene o Samoa. O se matatia muamua foi lea i le Itulagi lenei o le Pasefika, ua faatulaga ai le amanaiaina o le sao taua o Tina ma Tamaitai i upufai o Malo.

Ua o tatou molimauina le matagofie o lenei maota fono fou o le Palemene, o se tasi o matatia a lenei paeaiga. E momoli atu ai le faamalo i lo tatou Malo ma ana faiga pa’aga ma Malo mai fafo, o loo tatou galulue faatasi i le fausiaina o galuega tetele faapenei, ma isi atinae o loo faaauau pea, aua le manuia auiluma o si o tatou atunuu. 

O le manulauti o le Fono Aoao Faitulafono e pei ona faataoto i le Tulafono Faavae, o le lauliliuina ma le pasiaina o Tulafono e avea ma Tulafono a le Palemene o Samoa. O le mau a Samoa, “o le aso ma le filiga, o le aso foi ma le mataiga tila, ma e tautala aso” E momoli atu ai le faafetai ma le faamalo, aua o lea ua faamauina i le faagasologa o taualumaga o tauaofiaga a lenei paeaiga, mai lava i le 2016 e oo mai i le asō, ua silia ma le 120 Tulafono ua pasia e le Fono Aoao Faitulafono. O nei Tulafono o loo aofia ai ma Tulafono Autu ua toe fuatai, o Tulafono Toe Teuteu, faapea ma Tulafono Autu. E matau ma le totoa, o nei galuega tetele sa faatino i le tofa ma le moe tatala a Sui Mamalu o le Palemene, e laualuga ai le agaga o le feoeoea’i ma le fesufia’i o itutino o le Malo sa faapogai, aemaise o fautuaga faaletulafono e fitoitonu iai. Ua saga faamautuina ai foi i nei suiga, le matafaioi tumau a le Palemene, o le fausia lea o Tulafono e atagia ai faiga faavae lautetele o pulega lelei o faigamalo faa-temokarasi, e faaautu i le faamanino ma le faamalamalamaina o auala eseese  o loo faatino ai ona tiute ma galuega faapalemene.

Ou te faamalo atu i lau afioga i le Fofoga Fetalai i lau faatautaiga o le Maota fono o Samoa i lenei paeaiga. Faamalo le tofa, faafetai le taofiofi i’umaea i taimi e soua ai felafolafoaiga a le Palemene. E iloga le tautai o le loloto, e le soona si’i, a e apoapo, e tiu ma leoleosa’i le mamalu o le Palemene.

E fia faamauina foi le faafetai i galuega maeaea a Afioga i Taitaifono ma Sui Usufono uma o Komiti Faa-Palemene, ae lē gata i lea, o Komiti Faapitoa ma Komisi Suesue Faapitoa sa tofia e le Fono Aoao, e faatino sailiiliga i mataupu iloga na agai iai le silasila a le Palemene mo ni suiga talafeagai, e pei ona molimauina i lenei nofoaiga. O galuega tulituliloa ia a le Palemene, ua ausia ai se tasi o manulauti e pei ona unai’a pea e Palemene o Malo o le Taupulega, le Commonwealth.

O se tasi o tulaga sili na ausia e lenei paeaiga e pei ona matauina i faamaumauga a le Fono Aoao, o le vave lea o le tapenaina maeaea o Lipoti Faaletausaga a Matagaluega ma Faalapotopotoga Tumaoti uma a le Malo, ma faataatia i le Laulau a Fono a le Palemene mo le iloiloina. O se matatia ua saga atagia ai le faatauaina o le va nonofo ai o le Palemene ma le Pulega Faatonu, e tusa ma le faasinomaga o le Faavae. E momoli atu ai le faafetai tele i Faauluuluga o Matagaluega ma Faalapotopotoga Tumaoti a le Malo, i la outou galuega e aiaiuli ai i le taitaiga a le Afioga i le Palemia  ma le Kapeneta.

E momoli atu foi le faafetai i le galuega a le Ofisa Faafaavae i le tautuaina o le Fono usu a Samoa. Faamalo le tautua atunuu. O outou e lave i maninoa, e lave foi i faigata, ae e mau pea i aao o Iesu, tatou te malu ai.

O lea ua taoto lua le seuga i le faamoemoe o lenei aso, i le tapunia aloaia o galuega o lenei nofoaiga, ma faalauiloa ai ma le Tala Faasolopito o le Palemene o Samoa talu ona Tutoatasi si o tatou atunuu i le 1962. O le agaga faafetai lea, i le toe tomanatu i nai o tatou Tuaā sa o latou muai asā le gasū o le taeao, i upufai o lo tatou Malo. Faamalo faafetai i lau afioga i le Fofoga Fetalai ma lau afioga i le Taitai o le Maota, ona o se tofā ua a’e, e tuufatasia ma lomia lenei Tala Faasolopito o le tatou Palemene, o le a fai ma anofale aoga mo i latou uma o Sui Usufono o le Palemene i le lumanai, aemaise le fesoasoani tele mo nai fanau lalovaoa a Samoa  i le sailiga o le poto salalau.

E faamulia’i ma se ‘ai lau faafetai ia outou afioga i Sui Mamalu o le Palemene o le a malolo manumalo. Lau afioga i le Fofoga Fetalai Leaupepe Taimaaiono Toleafoa Faafisi; lau afioga i le Alii Minisita Tuitama Dr Talalelei Tuitama; lau afioga Aeau Dr Peniamina Leavaiseeta; ma lau afioga i le Minisita Lagolago Faasootauloa Taulapapa Pati.  Ua faamalo le fai o le faiva, ua faamalo le tautua Malo. Faafetai le tautua atunuu. O upu tautino a le Fai Salamo, “O e ua totoina i le fale o le Alii, e tupu olaola i latou i ona lotoa”. A oo ina ulusina, latou te fua mai pea lava, ma e malolosi ma lauolaola i latou.”

E talitonu e le uma le faaaogaina pea o lo  outou soifua mo le manuia o aiga, nuu, ma Ekalesia. Ia faamanuia tele le Atua i le faiga malologa. E momoli atu foi le faamalo ma le faafetai i lau afioga i le Minisita Lagolago lau Susuga Mulipola Laki. Ia faamanuia le Atua i nisi tiute ua Ia finagalo ai mo lau afioga.

A tatou taumavae i lenei taeao, ma taape le fuamanu sina, ia fofola e le Atua le maa taanoa i le ala. O la’u tatalo, ia sisila mai pea Fofoga alofa o le Tapaau i le Lagi ia Samoa ma lona Malo, ma ona tagata nuu. Ia to mai lagi manu mo Sui Usufono Mamalu o le Palemene. Ia manuia tele le alo atu o si o tatou atunuu i lana Faiga Filifiliga i le masina fou. Ia tumau le filemu ma le alofa tunoa o Le Atua ia Samoa ma lona Malo.

E ia te a’u le ava tele, ou te faasilasila atu ai e faapea,

Ua tapunia aloaia nei le Paeaiga Lona XVI o le Palemene o le Malo Tutoatasi o Samoa.

Soifua ma ia Manuia.

Share this:

Source

Stay Connected
255FansLike
473FollowersFollow
Must Read
Related News