Susū Lau Susuga Melepone Isara, Faifeau Samoa, Teutupe Aoao o le EFKS
Afifio Minisita o le Kapeneta
Susū Sui o le Ofisa o le Fono-fai-Tulafono
Afifio foi lau Afioga i le Fofoga Fetalai ma Faipule mamalu o le Palemene
Aemaise o Tatou Pa’aga mai Fafo
Sui mai Vaega eseese o le tatou o le Atunu’u
Tainane le Paia o Samoa ua potopoto
I le ava ma le faaaloalo e fai ai au ma sui o le Malō, e faafeiloa’i atu lō outou paia ma lō outou mamalu ua mafai ona tatou faatasi e molimauina le faalauiloaina aloaia o le tatou “Taiala mo le Lumana’i Manuia o Samoa (TLMS)” mo le tausaga faaletupe 2021/22 se’ia o’o atu i le 2025/26.
O lenei lomiga o lo’o faailoa manino ai taiala ma fuafuaga o lo’o ave iai le faamuamua mo galuega atia’e a Samoa mo le isi lima tausaga fa’aletupe o lumana’i.
O le sini autu o lenei Taiala, “Ia Fa’aagava’aina Alalafaga, Fa’amausali le Lotoifale, ma Fa’amaite le Fa’atupula’ia o le Tamao’aiga”. O le taunu’uga o lenei faamoemoe, o le a fa’ata’oto ai le ala ina ia ausia ai le tatou Va’aiga Taula’i o le a tulimata’i, ina ia: “Tausia le Nofo Fealofani, le Saogalēmū, ma le Sa’olotoga mo Tagata Uma”.
O lo’o ua tatou iai nei i taimi faigata e lē i tutupu muamua. I le lua tausaga talu ai na tatou molimauina uma le faʻamaʻi oti o lo’o a’afia ai nei le lalolagi atoa; ma o lo’o fa’aauau pea ona a’afiaga i le soifuaga ma tupe maua a ō tatou tagata aemaise o le tamāo’aiga o Samoa. O le ala lea, ua matou naunau ai e fa’aagava’aina o tatou nu’u ma alalafaga ina ia mafai ai ona soifua ma ola i nei tulaga lē mautonu o lo’o iai le lalolagi fa’apea le fa’aaogāina tatau o avanoa e maua e fa’atupula’ia ai o latou atiina’e.
O le matou fa’anaunauta’iga o le fa’aosofia ma una’ia le fa’atupula’ia o le tamaoaiga i tatou tagata. Ae peita’i, e lē mafai ona ausia lenei faamoemoe e tagata taitoatasi. E mo’omia lo tatou galulue so’oso’o tau’au i totonu o nu’u ma afioaga. O le fefa’asoaa’i ma le galulue fa’atasi, aemaise o le loto tasi, e tāua tele i le nofo fealofani ma le faasoaina o le manuia i totonu o tatou nu’u ma afioaga. E mana’omia ai faiga fa’apaaga mālosi a sui uma o vaega ma’oti, ma a tatou pa’aga mai fafo. O le tatou tutū fa’atasi, e mafai ai ona tatou fausia se ala e aga’i i le fa’amausalīina o le fa’atupula’ia o le tamaoaiga gafataulimaina.
O le Taiala lenei (TLMS) o lo’o fa’amatala mai ai Ta’iala Autū e lima:
- Fa’aleleia le atina’ega o le soifuaga lautele,
- Fa’alauteleina o le tamāoaiga ma gafataulimaina
- Saogalēmū ma faatuatuaina o pulega lelei
- Si’osi’omaga malupuipuia ma suiga o le tau, ma le
- Tūlaga i galuega a le Mālō ma atiina’e tetele
O Ta’iala Autū ta’itasi nei (Key Strategic Outcomes) o lo’o fa’amāioio mai ai tulaga i Vaega Fa’amuamua (Key Priority Areas), vaega ua ave iai le faatāua aemaise o Taunu’uga ua Fuafuaina (Expected Outcomes).
O atiina’e mo le soifuaga lautele o tagata, o lo’o pito i luga i le fa’ata’atiaga o taumafaiga a le tatou Mālō, fa’atasi ai ma le fausiaina o alāfua e siitia ai agava’a ma le tomai, fa’aitiitia le tulaga ma’ale’ale o le soifuaga, ma le agava’a tutusa i avanoa e maua mai le Mālō. O ni isi nei o ma’a fa’avae mo le tuliloaina o le soifuaga fa’afualoa, mālōlōina ma le fa’amalieina e fa’alagolago tele lea i luga o le faalauteleina o le tamāo’aiga ma ia gafataulimaina, ina ia ūna’ia ai le ola fefa’asoaā’i o manuia i totonu o nu’u ma afioaga. A’o tūmau pea le taua o taunuuga o tatou galuega, e tāua foi le silasila toto’a i le tatou filifiliga ma faaiuga i auala o le a tatou faatinoina ai ma ūia, e tulimata’i ai le ausia o le tatou Sini Autū. O lea, o le a matou faatāuaina ai le puipuia o aiā tatau o tatou tagata, fa’amautinoa le tulaga o le amiotonu ma le faatuatuaina o pulega lelei, fa’apea ma le sā’ilia o faiga pa’aga lelei e maua ai manuia mo Samoa. O lo’o tumau pea le tāua o le tulaga i le fa’asao ma le gafataulimaina o le tulaga i le si’osi’omaga, auā le lelei fausia o tulaga mausalī o le si’osi’omaga, faatasi ai ma le fa’amalosia o ālāfua e mafai ai ona tali atu i suiga o le tau fa’apea le puleaina lelei ma le mata’itūina o fa’alavelave matuiā. I le ō gatasi ai ma nei fuafuaga, o le a silasila toto’a le Mālō ina ia lagolagoina ma fa’ama’iteina ni atiina’e i galuega tetele ia gafatia, mausalī i le tali atu i suiga o le tau, ma ia mata’itūina lelei nei Aseta tetele, ina ia fausia se faavae malosi e tuliloa ai atiina’e tetele gafataulimaina.
I le aotelega, o galuega fa’atino a le Mālō o le a lima ta’ita’iina lea i lana ta’utinoga e aofia le:
- Faalauiloa ma Unaia se lumana’i e agava’a tutusa, gafataulimaina ma saogalēmū; e fa’avae i lo tatou talitonuga i le tāua o le lē fa’aitū’au, fa’aaloalo, ia aofia tagata uma, ma matāfaioi, e lē gata mo le isi tagata a’o le tatou si’osi’omaga.
- Fa’atino faiga fa’avae e amana’ia ma tali atu i manaoga ma avanoa mo tatou tagata, ma si’itia ai le tūlaga mausalī o nu’u ma afio’aga i totonu o le atunu’u.
- Malupuipuia lelei tūlaga i tūlāfono ma tausisia aiā tatau o tagata uma ma lō latou sa’olotoga.
- Fa’amalosia ma malupuipuia tatou tulaga tau tūlāfono ma pūlega lelei fa’a-le-Mālō, ina ia mautinoa o lo’o talafeagai ma le auga tonu na fa’atū ai aemaise o le atoaga o galuega fai e tali atu ai, i tagata uma o lo’o alala ma pāpā’a’ao i totonu o Samoa.
- Ia fa’atupula’ia le fa’alauteleina o se tamao’aiga e gafataulimaina ma mausalī, ina ia mafai ona tali atu i a’afiaga e ono tula’i mai le lalolagi aemaise o fa’afitauli ma lu’itau i totonu lava o si o tatou atunu’u.
I le tatou folauga e tuliloaina ai le ausiaina o taunu’uga o lo’o maioio mai i totonu o lenei ta’iala, e iai le manatu, o le mea mautinoa, o le a tatou feagai pea ma lu’itau ma fa’afitauli, ma taimi e tupu ai le lē mautonu. Ae peita’i, ona o le faasinomaga a le tagata i le fefa’asoa’i o tiute tauave mo atiina’e, o le tatou pulupululima ma tuu faatasi o tatou loto e tapasā ai le faafoeina lelei o le tatou “Taiala mo le Lumana’i Manuia o Samoa”, o le a lē taumate i le ete, le mautinoa o le fa’afaileleina ma le si’itiaina o le nofo fealofani, le sa’olotoga ma le saogalēmū mo tagata uma.
E avea ai foi lenei avanoa tāua, e momoli atu ai le agaga o le fa’afetai ma le fa’agae’etia i a tatou pa’aga uma lava sa mafai ona fesoasoani i soo se auala mo le tapenaina ma le fausiaina o lenei ta’iala. E aofia ai tatou pa’aga o loo fai ma sui o; nu’u ma afio’aga, pisinisi ma vaega tūma’oti, fa’alapotopotoga o nuu ma afio’aga, fa’alapotopotoga tuma’oti, pa’aga mai atunu’u i fafo, fa’atasi ai ma Matagaluega ma fa’alapotopotoga uma a le Malo. Ou te Faafetai atu i lō outou Tautua ma le lagolagosua e le gata i le tuufaatasia o lenei Taiala fou, ae o le fa’atinoina o galuega auā le taunuuga o taiala autū a le atunuu ua tuanai atu. O le matou tatalo, o le a faaauau pea le tatou galulue so’oso’o tau’au ma le felagolagoa’i ina ia mautinoa le ala tatou te malaga faatasi ai, auā se lumanai manuia mo tagata uma i Samoa nei.
O lea, ou te tu’uina atu ai lenei fuafuaga a le Malo, ua fa’aigoaina o le “Taiala mo le Lumana’i Manuia o Samoa 2021/22-2025/26” mo le fa’aaogāina e tagata uma.
Soifua ma ia manuia
