I le ava ma le fa’aaloalo tele e logoina ai le mamalu o le atunu’u i le tulaga o le fa’atinoina o le tui puipui o le KOVITI-19.
O le a taofia lē tumau nei le fa’atinoina o tui puipui o le KOVITI-19, a’o talia le taunu’u mai o isi tui puipui mo le fa’aauauina. E pei ona silafia le pipisi o le fa’ama’i o le KOVITI-19 i le lalolagi ma o lo’o tele ina ave le fa’amuamua i atunu’u ua tele ina a’afia, fa’atasi ai ma le suiga o le tele o femalagaiga ma uta e aumai totonu o le atunu’u. O lo’o galulue lava le Matagaluega fa’atasi ai ma le lagolago a le Malo mo feutagaina ma paaga fa’ava-o-malo ina ia vave ona taunu’u mai fanua tui puipui.
E tatalo atu ma le fa’aaloalo le mamalu o le atunu’u e lei faia o latou tui puipui muamua, e lava papale mai pea, auā e fa’agasolo atu lava ma aofia tagata uma o lo’o agava’a ona fai tui puipui i le fa’atinoga o le tuiga.
Mo tagata uma ua mae’a tui puipui muamua, ma ua tatau ona fai tui puipui lona lua e tusa ai ma le aso o lo’o i le pepa tui, e leai se āfaina pe a tuai ona faatino lou tui puipui. E 8-12 vaiaso le va o le tui muamua ma le tui lona lua ma o lo’o mafai ona aogā le tui puipui lona lua pe a faatino i totonu o le 10 i le 12 vaiaso.
O lo’o fa’aauau pea galuega a le Matagaluega i puipuiga i totonu o uafu ma malae va’alele ina ia mautinoa o lo’o saogalemu Samoa mai le a’afia ai le KOVITI-19.
E matou te talosagaina fo’i le lagolago a le atunu’u ina ia tautuana e fa’aauau pea a tatou puipuiga masani o le KOVITI-19 e pei ona iai le Poloaiga o Fa’alavelave Fa’afuase’i mo Puipuiga o le KOVITI-19 a’o fa’agasolo le fa’atinoina o tui puipui e pei;
• Taumamao mai Nofoaga tumutumu
• Fufulu mamā o lima ma fa’amamā uma vaega o le si’osi’omaga
• Fai Tali fofoga pe a malaga i nofoaga faitele
• Pupuni le fofoga i se solo ie mamā pe a tale
• Nofo i le fale pe a gasegase
• Fa’asaina o tamaiti ma tagata to’atele ona tumutumu i so’o se vaega o falema’i uma
O le a logoina atu lava le mamalu o le atunu’u i aso ma nofoaga o le a fa’aauauina ai tui puipui mo le silafia.
Mo nisi fa’amatalaga fa’amolemole – valaau le numera vili fua: 800-6440 pe asiasi le upega tafailagi: www.health.gov.ws , MOH Facebook po’o le Government Facebook.
Fa’afetai
Matagaluega o le Soifua Maloloina
