Ou te faapa’i malu atu i le faafofoga maimoa mai a si o tatou atunuu i lenei afiafi. E iai le talitonuga, o loo malutia pea lo outou soifua i le tausiga mamana a le Atua, o loo fola ai pea i fatu lē gae’e, la tatou savaliga, e ui i le faigata ua iai nei vaitau.
E oo mai ananafi ua 1,239 i latou ua pesia i le faamai, talu ona sao mai i tua i le aso 17 o Mati. O le 97% o i latou ua aafia o loo i Upolu nei, ae 3% o loo i Savaii. E leai se tasi o taofia i potu tigaina i le falemai i le taimi nei, ma o le toatele sa taofia ina ua aliae auga, ua te’a i tua i o latou aiga.
Sa faaiugafonoina e le Kapeneta i le vaiaso na te’a nei le toe iloiloina o le faagasologa o le galuega mo le faama’I, atoa ai ma poloaiga o vavao pe a maea le vaiaso muamua. I le aoauli nei sa toe iloilo tupe toa ai e le Kapeneta le tulaga o loo taoto ai galuega ma fuafuaga a le Komiti o Faalavelave Faafuasei ma faavae o nei faatinoga.
O taeao Aso Lua, 29 Mati e taunuu mai ai le 70,000 o a tatou tui o le Pfizer. O a tatou tui nei ua fuafua e faatino ai le tui lona tolu o tagata matutua e amata atu i le 18 tausaga le matutua agai i luga, ma faasopolia ai le vaega talavou mai le 11-17 tausaga le matutua e lei maea o latou tui. Ua i ai le fuafuaga o le a faagasolo le tuiga i itumalo taitasi i Upolu i le Aso Tofi nei, a o le Aso Faraile mo Savaii.
I le taimi nei, o loo maulalo le pasene o i latou uma maea tui lona tolu ona o le tulaga i le faasolosolo o le maua mai o vailau. Peitai o le uta tele o vailaau lea e taunuu mai taeao, o le a mafai ai loa ona faasolo le tuiga i le atunuu ina ia vave ona faasopolia. E faapea foi i le toe autalaina o tui muamua mo le fanau iti mai i le 5-11 tausaga le matutua mo Upolu ma Savaii aemaise i latou na misi i tuiga na faasolo muamua.
O le mau faavae o lenei fuafuaga, e matuā moomia ona opo tui lona lua, ma faatino le tui lona tolu e saga tapena ai o tatou tino e tatali le faamai.
O le a mafai ai foi ona fetuunai le aufaigaluega a le Soifua Maloloina ma isi a tatou aufaigaluega muaau, e faatino tuiga ma auaunaga tau i le puipuiga ona o loo siisii i luga le fuainumera o i latou ua aafia i le faamai.
E faapea foi ona faatulaga ma lalago tonu ma fuafuaga a Matagaluega ma Faalapotopotoga a le Malo, Pisinisi tumaoti, Ekalesia, ma tapenaga a Nuu ma Afioaga taitasi mo le agai atu i le lumanai, i le mau tauave o le laasaga fou i lo tatou soifuaaga faaletagata ‘o le soifua faatasi ma le Koviti 19’. E le gata la i le uunaia o lo tatou puipuiga faasoifua maloloina, ae faapena foi i le vaai mamao ma le agai atu i le lumanai o a tatou fuafuaga mo le lumanai manuia o le atunuu.
E faavae i nei mafuaaga, le faaiugafonoina ai e le Kapeneta le faaauau ona iai le atunuu i le laasaga 3 mo leisi vaiaso e afua atu i le vaeluaga o le po taeao Aso Lua, 29 Mati seia aulia le Aso Lua, 5 Aperila 2022.
Peitai ua toe fetuunai nisi o poloaiga o vavao e aofia le.
- Le tatalaina o auaunaga moomia o loo tatala i le taimi nei i le Aso Lua (29 Mati), Aso Tofi (31 Mati), Aso Toonai (2 Aperila) ma le Aso Lua (5 Aperila) mai i le itula e 6.00 i le taeao e oo atu i le 4.00 i le afiafi.
- Le feoai o vaa i le va o Upolu ma Savaii mo le lauina o uta, suauu ma vailaau tau falemai i aso ma itula e tatala ai auaunaga moomia. E auala ai ona auina mai tagata mai Savaii ua faamaonia e malaga i atunuu i fafo, ma aiga tupito o i latou ua maliliu i Upolu nei ma Savaii peitai e muai faailoa faamaoniga o nei vaega.
- Le amata faatino o malaga a le vaa a lalo e auina atu oloa i Amerika Samoa ma auina mai ai oloa i le atunuu i lana Malaga masani i vaiaso taitasi
O le auiliiliga o poloaiga o vavao o le a faailoa atu e faamatalaga e tuuina atu mai le Malo. O nei vaega uma o le a toe iloilo e le Kapeneta mo isi laasaga ma toe fofogaina ai le atunuu i le amataga o le vaiaso fou.
E talosagaina le paia o le atunuu e fesoasoani mai e tulei faatasi a tatou taumfaiga mo le tuiga i lenei vaiaso. O le tatou puipuiga lea e mafai ai ona faaitiitia aafiaga ogaoga e aliae mai, pe a aafia i le faamai, pe iu ai ai lava i le maliu, aemaise lava i le tulaga faigata ua iai le atunuu i le maualuga o i latou ua aafia i faamai le pipisi.
Ia agalelei le Atua i lau tapuaiga Samoa, ma ia tatou maua pea lona filemu, auā tatou te manumalo aiai i nei uma, i le faatasi mai o Iesu Keriso ia i tatou. Ia manuia le tapuaiga a le atunuu.
SOIFUA
____________________________________________________________________
